Сабиқ «шәрқий түркистан җумһурийити» ниң ахирқи рәһбәрлиридин әсәт исһақофниң нәвриси лагерға елип кетилгән

Мухбиримиз әркин
2019-10-16
Елхәт
Пикир
Share
Принт

Сабиқ «шәрқий түркистан җумһурийити» ниң ахирқи рәһбәрлиридин әсәт исһақофниң нәвриси, үрүмчи шәһәрлик 14‏-оттура мәктәпниң хитай тили оқутқучиси марат исһақофниң өткән йили тутқун қилинип, лагерға елип кетилгәнлики мәлум болди. Чәтәлдики уйғур лагер тутқунлириниң санлиқ учур амбири болған «шаһит. Биз» намлиқ тор архипиниң учурлирида қәйт қилинишичә, 2018‏-йили 11‏-айда тутқун қилинип лагерға қамалған марат исһақоф, бу йилниң яз айлирида қоюп берилгән болсиму, лекин у өзи қамалған лагер әтрапидики бир завутта мәҗбури әмгәккә селинмақтикән.

«Шаһит. Биз» ториниң учурлирида, униң илгири русийәдики татаристан җумһурийитиниң қазан шәһиридә, шундақла шинҗаң университетиниң алақә инженерлиқ кәспидә оқуғанлиқи илгири сүрүлгән. Нөвәттә көзәткүчиләр, әсәт исһақофтәк сабиқ шәрқий түркистан җумһурийитидә, шундақла 1949‏-йили шәрқий түркистан җумһурийити йоқутулғандин кейинки шинҗаң өлкилик һөкүмәт вә уйғур аптоном районлуқ һөкүмәттә муавин рәис қатарлиқ һалқилиқ вәзипә өтигән атақлиқ бир сиясий шәхсниң нәвриси болған марат исһақофниң тутқун қилинип, лагерға қамилиши һәм мәҗбури әмгәккә селинишини хитайниң уйғур районида елип бериватқан бастуруш һәрикитиниң көлими, дәриҗисиниң қанчилик шиддәтлик вә қорқунчлуқ икәнликини көрситиду, дәп қаримақта.

Әхмәтҗан қасими қатарлиқ рәһбәрләр 1949‏-йили бейҗиңға сөһбәткә меңип һадисигә учрап, иккинчи нөвәттә сәйпидин әзиз маңғанда әсәт исһақоф ғулҗидики һөкүмәтниң күндилик ишлириға рәһбәрлик қилишқа тәйинләнгән. Хитай азадлиқ армийиси 1949-йилиниң ахирлирида уйғур дияриға киргәндә у «иттипақ» тәшкилати вә һөкүмәт ишлириға мәсул иди. Әсәт исһақофниң компартийә һөкүмранлиқ дәвридики сиясий һаятида униң чиңдав йиғинидики ипадиси алаһидә орунни игиләйду. У компартийәниң 1957‏-йили ечилған чиңдав йиғинида хитай баш министири җов енләй билән уйғурларға иттипақдаш җумһурийәт беришни талишип, нам чиқарғаниди. Мәлум болушичә, нөвәттә униң нәвриси үрүмчидики бир лагерниң компютерға мунасивәтлик мәмурий ишлирини қиливатқан болуп, униң һәптидә яки айда 3 күн өйигә қайтишиға рухсәт қилинидикән. Марат исһақофниң аяли уйғур болуп, уларниң бир пәрзәнти барикән.

Пикирләр (0)
Share
Толуқ бәт