Sabiq "Sherqiy türkistan jumhuriyiti" ning axirqi rehberliridin es'et is'haqofning newrisi lagérgha élip kétilgen

Muxbirimiz erkin
2019-10-16
Élxet
Pikir
Share
Print

Sabiq "Sherqiy türkistan jumhuriyiti" ning axirqi rehberliridin es'et is'haqofning newrisi, ürümchi sheherlik 14‏-ottura mektepning xitay tili oqutquchisi marat is'haqofning ötken yili tutqun qilinip, lagérgha élip kétilgenliki melum boldi. Chet'eldiki Uyghur lagér tutqunlirining sanliq uchur ambiri bolghan "Shahit. Biz" namliq tor arxipining uchurlirida qeyt qilinishiche, 2018‏-yili 11‏-ayda tutqun qilinip lagérgha qamalghan marat is'haqof, bu yilning yaz aylirida qoyup bérilgen bolsimu, lékin u özi qamalghan lagér etrapidiki bir zawutta mejburi emgekke sélinmaqtiken.

"Shahit. Biz" torining uchurlirida, uning ilgiri rusiyediki tataristan jumhuriyitining qazan shehiride, shundaqla shinjang uniwérsitétining alaqe inzhénérliq kespide oqughanliqi ilgiri sürülgen. Nöwette közetküchiler, es'et is'haqoftek sabiq sherqiy türkistan jumhuriyitide, shundaqla 1949‏-yili sherqiy türkistan jumhuriyiti yoqutulghandin kéyinki shinjang ölkilik hökümet we Uyghur aptonom rayonluq hökümette mu'awin re'is qatarliq halqiliq wezipe ötigen ataqliq bir siyasiy shexsning newrisi bolghan marat is'haqofning tutqun qilinip, lagérgha qamilishi hem mejburi emgekke sélinishini xitayning Uyghur rayonida élip bériwatqan basturush herikitining kölimi, derijisining qanchilik shiddetlik we qorqunchluq ikenlikini körsitidu, dep qarimaqta.

Exmetjan qasimi qatarliq rehberler 1949‏-yili béyjinggha söhbetke méngip hadisige uchrap, ikkinchi nöwette seypidin eziz mangghanda es'et is'haqof ghuljidiki hökümetning kündilik ishlirigha rehberlik qilishqa teyinlen'gen. Xitay azadliq armiyisi 1949-yilining axirlirida Uyghur diyarigha kirgende u "Ittipaq" teshkilati we hökümet ishlirigha mes'ul idi. Es'et is'haqofning kompartiye hökümranliq dewridiki siyasiy hayatida uning chingdaw yighinidiki ipadisi alahide orunni igileydu. U kompartiyening 1957‏-yili échilghan chingdaw yighinida xitay bash ministiri jow énley bilen Uyghurlargha ittipaqdash jumhuriyet bérishni taliship, nam chiqarghanidi. Melum bolushiche, nöwette uning newrisi ürümchidiki bir lagérning kompyutérgha munasiwetlik memuriy ishlirini qiliwatqan bolup, uning heptide yaki ayda 3 kün öyige qaytishigha ruxset qilinidiken. Marat is'haqofning ayali Uyghur bolup, ularning bir perzenti bariken.

Toluq bet