Toli nahiyesining qazaq hakimi meschit chiqishqa qarshi chiqqanliqi üchün tutqun qilin'ghan

Muxbirimiz erkin
2019-11-08
Élxet
Pikir
Share
Print

Uyghur diyaridiki toli nahiyesining qazaq hakimi qehriman axmanning meschit chéqishqa qarshi chiqqanliqi üchün tutqun qilin'ghanliqi ilgiri sürüldi.

Toli nahiyesining mezkur hakimining qazaqistanda turushluq uruq-tughqanlirining kishilik hoquq teshkilatlirigha ashkarilishiche, qehriman axman buningdin 18 ay ilgiri tutqun qilin'ghan bolup, uning hazirgha qeder héchqandaq iz-dériki yoq iken.

Xitay hökümiti2017‏-yili3‏-aydin bashlap Uyghur, qazaq we rayondiki bashqa musulmanlarni keng kölemlik tutqun qilish bilen bir waqitta meschitlerni keng kölemde chéqishqa bashlighan. Bu jeryanda bu heriketke qarshi turghan yaki uningda aktip bolmighan nurghun yerlik kadirlar "Ikki yüzlimichilik" bilen eyiblinip tutqun qilin'ghan we qamaqqa höküm qilin'ghan idi. 

Nöwette qehriman axmanning aqiwitining qandaq bolghanliqi melum emes. Uning qazaqistanda turushluq bir newre singlisi nurjennet ulanbayning qazaqistandiki "Atayurt pida'iyliri" kishilik hoquq teshkilatigha bildürüshiche, 47 yashliq qehriman axman "Toli nahiyesining hakimliq wezipisidiki waqtida buyruq chüshürüp, bir meschitni chéqishni ret qilghan," iken. "Atayurt pida'iyliri" ning ezasi re'isqan 7‏-noyabir küni radiyomizgha bergen uchurida nurjennetning sözini neqil keltürüp, "U wezipidiki waqtida meschit chéqishni ret qilghan. Shunga lagérgha élip kétilgen. Buninggha 18 ay bolghan bolsimu, lékin uning ölük-tirikliki heqqide héchqandaq uchur yoq," dégen. 

Xitay tashqi ishlar ministirliqining bayanatchisi géng shu'ang buningdin téxi bir kün awwal Uyghur rayonida yighiwélish lagérlirining mewjutluqini ret qilghan. U bu sözlerni amérika tashqiy ishlar ministiri mayk pompéyoning 5‏-noyabir küni qilghan Uyghurlar heqqidiki sözige qayturghan inkasida éytqan. Mayk pompéyo Uyghurlar heqqidiki bayanatida béyjing da'irilirini chet'eldiki Uyghurlargha we ularning yurtidiki uruq-tughqanlirigha parakendichilikni toxtitishqa chaqirghan idi.

Toluq bet