Uyghur rayonluq partkomning uniwérsitétlargha tekshürüsh guruppisi ewetishi diqqet qozghidi

Xitay xelq torining 27-dékabir xewiride, Uyghur aptonom rayonluq partkomning qararigha asasen siyasiy idiyiwi terbiye xizmitini we kompartiye intizamini tüzeshni nishan qilghan 1-türkümdiki tekshürüsh guruppilirining rayondiki aliy bilim yurtliridin “Shinjang uniwérsitéti”, “Tébbiy uniwérsitéti” qatarliq 8 mektep we aptonom rayonluq xelq ishlar idarisi, soda-sana'et idarisi qatarliq 10 orun'gha ewetilgenliki tilgha élindi.

Xewerde yene, herqaysi uniwérsitétlargha ewetilgen xizmet guruppilirining yéqinda échilghan xitay memliketlik aliy mektepler idiyiwi xizmet yighini we Uyghur aptonom rayonluq 9-nöwetlik partkom yighinining rohini emeliyleshtürüshni meqset qilghanliqi, aliy mekteplerde mewjut bolghan kompartiye intizamigha xilap qilmishlarni tüzesh we bir terep qilishni asasiy wezipe qilidighanliqi alahide tekitlen'gen.

Chet'ellerdiki Uyghur teshkilatliri, pa'aliyetchiliri we weziyet analizchiliri da'irilerning Uyghur diyaridiki uniwérsitétlarda yéqindin buyan barghanche kücheytiwatqan siyasiy telim terbiye xizmitige jiddiy diqqet qiliwatqan bolup, dunya Uyghur qurultiyi bayanatchisi dilshat rishit ependi radiyomizda öz qarishini bayan qilip, “Da'irilerning Uyghur diyaridiki aliy bilim yurtlirida siyasiy idiyiwi terbiyini tekitlishi emeliyette xitay hökümitining rayonda yürgüzüwatqan siyasiy, milliy we diniy basturushigha qarita Uyghurlarda barghanche küchiyiwatqan qarshiliq keypiyatidin ensirewatqanliqining ipadisi” dédi.