Uyghur diyaridiki wirus yuqumdarlirining sani izchil ashmaqta

Muxbirimiz eziz
2020-08-05
Élxet
Pikir
Share
Print

Yéqindin buyan köpchilikning diqqitide boluwatqan Uyghur diyaridiki tajsiman wirusi yuqumida bimarlarning sani barghanséri éship méngiwatqanliqi melum. 5-Awghusttiki xitay axbaratlirining xewirige asaslan'ghanda, aldinqi künning özide yéngidin 22 yuqumdar bayqalghan. Wirus yuqumdarlirining mutleq köp qismi ürümchide bolup, hazirche bashqa jaylargha zor kölemde tarqilish ehwali bayqalmighan.

Xitay hökümitining bashqurushidiki shinxu'a agéntliqining 5-awghusttiki xewiride éytilishiche, ürümchi sheherlik yuqumluq késelliklerni kontrol qilish merkizining mudiri süy yen shu künidiki axbarat élan qilish yighinida "Ürümchidin bayqalghan hazirqi wirus ewrishkilirining shekli asasen bir xil bolup, bu ularning oxshash bir menbedin tarqalghanliqini körsitidu," dégen. Emma bu menbening qeyer ikenlikini éytmighan.

Xitay hökümitining wuxendiki tajsiman wirusi yuqumi mezgilide izchil yalghan uchur tarqitip kelgenlikini esletken analizchilar ürümchi shehiridiki yuqum ehwalining heqiqitidin guman qilmaqta iken. Bolupmu Uyghur diyaridiki ushtumtut peyda bolup qalghan hemde menbesi sirliq boluwatqan wirus yuqumining kütülmigen aqiwetlerge élip bérishi nöwette nurghun kishini endishige salmaqta iken.

Toluq bet