Юқум мәзгилидә үрүмчидә мал баһаси шиддәт билән өрләп кәткән

Мухбиримиз ирадә
2020-08-06
Елхәт
Пикир
Share
Принт

Йеқиндин буян иҗтимаий таратқуларда тарқалған син көрүнүшлиридә үрүмчи вә уйғур елиниң башқа җайлирида давам қиливатқан юқумни тизгинләш давамида көктат қатарлиқ күндилик турмуш лазимәтләри баһасиниң һәддин зиядә өрләп кәткәнлики мәлум болған иди.

5-Авғуст күни, «хитай хәвәрләр тори» тарқатқан бир хәвәрдиму юқум мәзгилидә мал баһасида қалаймиқанчилиқ пәйда болуп, аһалиләргә қийинчилиқ пәйда қилғанлиқи ашкариланди. Бу һәқтики хәвәрдә ейтилишичә, үрүмчидә юқум мәзгилидә мал баһасини қәстән өрлитип базарда қалаймиқанчилиқ пәйда қилған тиҗарәтчиләр җазаланған болуп, 7-айниң 17-күнидин һазирғичә үрүмчидә баһани қалаймиқан өстүрүшкә мунасивәтлик җәмий 329 дело тәкшүрүлгән вә җәмий 520 миң йүән җәриманә қоюлған вә мусадирә қилинған. Хәвәрдә йәнә үрүмчи даирилириниң түрлүк тәдбирләрни елип, аһалиләрниң күндилик турмуш буюмлири вә йемәк-ичмәк баһасиниң муқимлиқиға капаләтлик қилинғанлиқи тәкитләнгән.

Иҗтимаий таратқуларда тарқитилған көрүнүшләрдә мал баһасиниң һәддидин зиядә өрлишидин башқа, көктат вә мевә-чевә ишләпчиқириватқан деһқанларниңму еғир зиян тартқанлиқи, уларниң мәһсулатлириниң юқум контроли сәвәблик қолдин чиқмай, еғир зиян тартқанлиқи мәлум болған иди.

Бу хилдики син көрүнүшлири чәтәлләрдики иҗтимаий тор бәтләрдә кәң тарқилип, хитай һөкүмитиниң юқумни контрол қилиш тәдбирлириниң кишиләргә елип келиватқан түрлүк қийинчилиқлири вә бундақ тәдбирләрниң юқумни контрол қилишта зади қанчилик үнүми барлиқи һәққидә күчлүк муназириләрни пәйда қилмақта.

Пикирләр (0)
Share
Толуқ бәт