Уйғур елидә таҗсиман вирус билән юқумланғучилар сани 637 гә өрлигән

Мухбиримиз ирадә
2020-08-06
Елхәт
Пикир
Share
Принт

Уйғур аптоном районлуқ даириләр 5-авғуст саәт 0 дин 24:00 гичә болған арилиқта уйғур елидә йеңидин таҗсиман вирус билән юқумланған кишиләр санини 27 нәпәр дәп елан қилди. Буниң билән уйғур елидики омумий юқумланғучилар сани 637 нәпәр, көзитиш астида туруватқан адәм сани 17301 нәпәргә йәткән.

Хитай даирилири йеңидин юқумланған 27 нәпәр кишиниң һәммисиниң үрүмчидә икәнликини илгири сүргән. Бирақ бүгүн хитайниң «йәр шари вақти гезити» инглизчә тарқатқан бир хәвиридин мәлум болушичә, қәшқәрдин йолға чиқип, алди билән шаңхәй, андин хаңҗуға йетип кәлгән ваң фамилилик 19 яшлиқ бир хитайға таҗсиман вирус билән юқумланған, дәп диагноз қоюлған. Әмма униңда һечқандақ кесәллик аламити йоқ болуп, 8-айниң 4-күни ваң фамилилик көз опиратсийәси қилдуруштин бурун униңға икки хил юқум тәкшүрүши елип берилған, нәтиҗидә һәр икки тәкшүрүштә мусбәт нәтиҗә чиқип, униң юқумланғанлиқи оттуриға чиққан.

Хитай даирилири һазирғичә қәшқәрдә юқумланғучи санини бир нәпәр дәп елан қилған вә униңму үрүмчидин кәлгәнликини дәп келиватқан болсиму, бирақ юқириқи бу хәвәр қәшқәрдики йошурун хәвпниң хели юқирилиқини көрситип бәрмәктә.

Уйғур елидики юқум әһвалиға аит истатескилар интайин чәклик, бирақ юқумни тизгинләш үчүн қоллиниливатқан тәдбирләр дәриҗидин ташқири. «Тәңритағ тори» ниң хәвәр қилишичә, үрүмчи шәһири «нуқтилиқ район» вә «нуқтилиқ кишиләр топи», «юқумлиниш хәвпи юқири», «асан юқумлинидиған кишиләр топи» дәп аталған гуруппиларға қарита 3-нөвәтлик ноклеик кислатаси тәкшүрүшини қанат яйдурған.

Уйғур аптоном районлуқ даириләр йәнә кадир-хизмәтчиләрни юқумни тизгинләш хизмәтлиригә кәң көләмдә тәшкилләватқан болуп, пәқәт ақсу вилайитиниң өзидила 12 миңдин артуқ аталмиш «иттипақ әзаси» «юқумниң алдини елиш пидаийлар һәрикити» дегәндәк вәзипиләргә орунлаштурулған.

Пикирләр (0)
Share
Толуқ бәт