Қәшқәр конишәһәр наһийәсидики таҗсиман вируси юқуми давамлиқ көпийиватқан болуп, 4-өктәбиргә қәдәр йеңидин юқумланғанларниң байқалғанлиқи хитай ахбаратлиридин мәлум болмақта.
Хитай һөкүмитиниң канийи болған шинхуа агентлиқиниң 4-өктәбирдики хәвиридә ейтилишичә, ениқ дягноз қоюлған вирус юқумдари икки нәпәр, аламәтсиз юқумдарлири 116 нәпәр болған. Әмма хитай һөкүмитиниң изчил вирус юқуми һәққидә һәқиқий санни йошуруштәк қилмиши түпәйлидин вирус юқуминиң кеңийиватқанлиқи мәлум болсиму, униң һәқиқий әһвали йәнила намәлум һалда икән.
«Йәршари вақти» гезитиниң 4-өктәбирдики хәвиридә ейтилишичә, һазир һөкүмәт тармақлири аламәтсиз юқумдарлар сәвәбидин бу вирусниң техиму кәң районға тарқилип кетишидин әнсиримәктә икән. Фудән университетидин ярдәмгә кәлгә юқумлуқ кесәллик мутәхәссиси җяң чңву бу һәқтә сөз қилип «аламәтсиз бимарлар байқалмай қалса вирус улардин башқа җайлардики башқа кишиләргә тарқилиду» дегән. Униң бу сөзлирини бәзи анализчилар нөвәттики қамал тәдбирлириниң техиму қаттиқ давам қилишидин дерәк бериду, дәп қаримақта икән.
Хәвәрдә ейтилишичә, хитай даирилири нөвәттә вирус юқумини тәкшүрүш хизмитини техиму кәң көләмдә давам қилиш үчүн җиддий тәдбир алмақтикән. Әмма хитай һөкүмитиниң бу һәқтики хәвәрләрни қаттиқ контрол қилиши арқисида бу қетимқи вирус юқуминиң қайси дәриҗидә икәнлики һәққидә көплигән гуманлиқ нуқтилар мәвҗут болмақтикән.
