Uyghur diyaridiki wirus yuqumining yéngiwashtin örlishi endishe qozghimaqta

Uyghur diyarida tajisiman wirusi yuqumining yéngiwashtin ewjige chiqiwatqanliqi yéqindin buyan köpligen axbarat yolliridin melum bolushqa bashlighan bolup, xitay da'irilirining bu heqtiki uchurlirimu biwaste halda bu yüzlinishni delillimekte.

Uyghur aptonom rayonluq hökümet élan qilghan 21-noyabirdiki yuqum weziyiti doklatida éytilishiche, shu küni yéngidin 893 kishige alametsiz yuqumdar, dep di'agnoz qoyulghan. Yéngidin köpeygen wirus yuqumdari 18 bolghan.

Xitay hökümitining 20-qurultiyi mezgillide xitayning wirus yuqumi heqqidiki uchurliri “Chong jehettin yaxshilinish we kontrol qilish” ning emelge ashqanliqini merkez qilghan bolsa, emdilikte qurultay axirlashqandin kéyin wirus yuqumining yéngidin yuquri pellige kötürülüshi heqqidiki ‍uchurlarning otturigha chiqishi, her sahe xelqining bu mesilige bolghan türlük endishilirini ashurushqa bashlidi.

“Amérika awazi” ning 22-noyabirdiki xewiride éytilishiche, béyjing shehride hazir tajisiman wirusining yamrishi tézdin örlewatqan bolup, mushu heptining axirida üch kishi wirus sewebidin ölgen. Hökümet da'iriliri bolsa nöwettiki wirus yuqumini “Eng murekkep, eng keskin” dep teswirleshke bashlighan. Emma xitay tewesidiki yamrash bilen Uyghur diyaridiki yamrashning qandaq baghlinishi barliqi hazirche namelum bolup turmaqta.

Gerche ilgiri Uyghur diyaridiki wirus yuqumining kontrol qilin'ghanliqi heqqide bir qatar xewerler tarqitilghan bolsimu, türlük uchurlar nöwette wirus yuqumining xitay da'iriliri üchün izchil eng chong bash aghriqi boluwatqanliqini körsetmekte. Jümlidin Uyghur aptonom rayonluq xelq hökümitining tor bétide wirus yuqumigha qarshi turushning nöwettiki “Xelq urushi” bolup qalghanliqi alahide yer alghan bolup, wirus yuqumining emeliyette teshwiqat xewerliride éytilghandinmu éghir ikenliki toghrisida türlük texminler otturigha chiqmaqta.