Uyghur rayonida yuqum nisbiti heqiqeten nölge chüshtimu?

Muxbirimiz jewlan
2022.12.21

Ijtima'iy taratqularda chiqiwatqan süretlik we widiyoluq xewerlerge qarighanda, xitay hökümiti “Yuqumni nölge chüshürüsh” qamal siyasitini emeldin qaldurup, iqtisadni güllendürüshni tekitlewatqan künlerde béyjingda yuqum weziyiti éghirliship, dora yétishmesliktin ölgenler köpiyip ketken. Shényang, shangxey, gu'angju qatarliq sheherlerdimu yuqumdarlar köpeygen, wirustin mudapi'elinish üchün talagha chiqmighanlar yenila köp sanliq bolghan؛ dorilarni bulang-talang qilip sétiwélish, bésip yétiwélish we örlitip sétish shamili ewj alghan.

Mushundaq ehwalda “Shinjang tori” öz teshwiqatini kücheytip, “Xatirjem bolunglar! shinjang qeshqerning her qaysi jaylirida dorilar yéterlik, baha muqim” dégen xewerni chiqarghan. 21-Dékabir küni élan qilin'ghan bu süretlik xewerde mekit, maralbéshi, qaghiliq nahiyeliridiki dorixanilarda “Töt xil dora”, dawalash we wirustin mudapi'elinish üskünilirining yéterlik ikenliki, bahasining muqimliqi we éhtiyaji barlargha normiliq sétip bérilidighanliqi körsitilgen.

Uningdin bashqa, xitayche “Tengritagh tori” mu 21-dékabir küni buninggha munasiwetlik xewer tarqitip, nuqtiliq doxturxana we ikkinchi, üchinchi derijilik doxturxanilarda éghir késellerning dawalinishi üchün doxtur-séstiralarning yéterlik seplen'genliki, dawalash üsküniliri we kariwatlarning köpeytilgenlikini teshwiq qilghan.

Ötkenki xewerlirimizde melum bolghinidek, xitay taratquliri Uyghur rayonidiki yuqum ehwalining nisbeten éghirliqi we bu wirus bilen “Uzaq muddetlik küresh qilidighanliqi” heqqide xewerlerni tarqatqanidi. Emma mezkur taratqular hazir yéngidin köpeygen yuqumdarlar heqqide héchqandaq uchur bermigen, peqet xitay hökümitining yéngi kowid siyasitini, yeni qamalni boshitish heqqidiki maddilirini izchillashturuwatqanliqi, doxturxana we ambulatoriye mulazimitini kücheytiwatqanliqi heqqide xewer bergen.

Yillardin béri ichkiri xitayda apet bolghanda Uyghur rayonining aman qalmaydighanliqi, hetta téximu éghir apetke uchraydighanliqi tekrarlinip kelgen hadise idi. Ichkiri xitayda wirus apiti éghirlishiwatqan, ölüm-yétim köpiyiwatqan ehwalda nechche aydin béri yuqum apiti üzülmey bolup turghan Uyghur rayonida yuqum heqiqeten nölge chüshtimu? béyjingdek sheherlerde dora-okullar we kariwatlar yétishmey, yuqumdarlar ölüwatqan ehwalda Uyghur rayonida hemme nerse tel, shara'itlar yéterlik bolup kettimu? halbuki, muxbirimizning éniqlishigha qarighanda, ürümchidimu dora yétishmeslik ehwali körülüshke bashlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.