Xitay da'iriliri Uyghur diyarigha xitay ölkiliridin yene zor türkümde oqutquchi qobul qilmaqchi bolghan

Muxbirimiz sada
2019-06-18
Élxet
Pikir
Share
Print

Uyghur aptonom rayon da'iriliri bu yil yene xitayning ichkiri ölkiliridin zor türkümde oqutquchi qobul qilishqa kirishken bolup, bu yil xitay ma'arip ministirliqi özi biwasite "Shinjang we tibetke 10 ming oqutquchi ewetish pilani" boyiche ikkinchi türkümde zor sandiki oqutquchilarni Uyghur diyaridiki yéza-bazar we kentlerge ewetishni pilanlighan.

Shinxu'a torining 18-iyundiki xewirige qarighanda, xitay da'iriliri özining bu pilanining Uyghur diyarining "Asasiy qatlimidiki yéza-bazar we kentlerge oqutquchi yétishmeslik mesilisini hel qilish üchün élin'ghan tedbiri" ikenlikini chüshendürgen. 

Melum bolushiche, Uyghur diyarining her qaysi nahiyeliridiki ma'arip tarmaqliri izchil élan chiqirip, ichkiri xitaydin zor türkümde oqutquchi qobul qilidighanliqi, bularning ma'ash we teminatining yuqiri bolidighanliqini teshwiq qilip kelgenidi. Nöwette, Uyghur diyaridiki barliq Uyghur mektepliridiki Uyghur tili ma'arip emeldin qaldurulup, oqutquchilar qoshunini asasen xitaylar igilewatqanliqi melum bolmaqta. 

Xewerde körsitilishiche, bu xitay ma'arip ministirliqining "Shinjanggha 10 ming oqutquchi ewetish pilani" ning ikkinchi türkümi bolup, bu pilan boyiche, xitayning ichkiri ölkiliridin Uyghur diyarining asasiy qatlimigha ewetilidighan xadimlar 5000 neper oqutquchini öz ichige alidiken. 

Xewerde déyilishiche, Uyghur aptonom da'iriliri bu yil rayondiki oqutquchi qobul qilish kölimini 19 ming 900 ademge kéngeytidiken. Uningdin bashqa yene 4000 neper aliy mektep oqughuchisini Uyghur diyarining yéza-kent rayonlirigha praktika qilish üchün ewetip, rayonning praktika oqutquchi qoshunini kéngeytidiken. 

Nöwette Uyghur diyarida ikki milyondin artuq Uyghur, qazaq we bashqa millet kishiliri xitayning jaza lagérlirigha qamalghan bolsa, lagér sirtidiki yashlarning bir qismi atalmish "Yéza éshincha emgek küchi" namida ichkiri ölkilerge yötkelgen. Emdilikte Uyghur diyarining asasiy qatlimigha "Oqutquchi yétishmeslik" namida ichkiri ölkilerdin xadimlarning köplep ewetilishi közetküchilerning diqqitini qozghighan. 

Uyghur közetküchilirining qarishiche, hazir xitay hökümiti xitay tilidiki ma'aripni rayonda keng omumlashturup, Uyghur tilini ma'arip, pen-téxnika we memuriy sahedin pütünley siqip chiqirish muddi'asigha yetmekte. Emeliyette bolsa, xitayning milliy téritoriyelik aptonomiye qanuni we bashqilarda Uyghur tilining shinjang Uyghur aptonom rayonining hökümet, ma'arip we bashqa saheliridiki ishlitish hoquqi étirap qilin'ghan bolsimu, hazir xitay da'iriliri öz qanunlirigha özliri xilapliq qilmaqtiken.

Toluq bet