Xitay medeniyitini Uyghurlar teshwiq qilish yuqiri dolqun'gha kötürülmekte

Muxbirimiz eziz
2019-01-22
Élxet
Pikir
Share
Print

Uyghurlar diyaridiki siyasiy basturushning axirqi meqsiti heqqide herxil mulahiziler otturigha chiqiwatqanda xitay hökümitining xitay medeniyitini aktipliq bilen teshwiq qilishi bu jehettiki bezi hökümlerning toghriliqini delillimekte.

Shinxu'a agéntliqining 22-yanwardiki xewiride éytilishiche, "Shinjang ottura tüzlenglik medeniyitini algha sürüsh jem'iyiti" bilen "Shinjang xettatlar jem'iyiti" bir türküm xitay "Hösnxet ustiliri" din ömek teshkillep Uyghur aptonom rayonluq Uyghur tébabet doxturxanisigha chaghanliq hal sorashqa kelgen.

Xewerdin déyilishiche, mezkur ömektikiler moy qelem arqiliq Uyghur ishchi-xizmetchilerge xitayche hösnxetning "Karametke tolghan jezbidarliqi" we "Sumbatliq qurulmisi" ni namayish qilghanda ularni oriwalghan Uyghurlar "Bes-beste maxtap kétishken" shuningdek bir qisim doxturlar xitayche hösnxetning güzellikidin hayajan'gha chömüp, ulardin xitayche hösnxet yézishni ögen'gen. Xewerde tursuntay memtimin isimlik bir Uyghur doxturning hetta "Xitayche xetlerdin qanchilik iptixarliq hés qilidighanliqini éytqanliqi" buninggha misal qatarida körsitilgen.

Xewerde yene bu "Hösnxetchi ustilar" ning xitay kompartiyesining alaqidar siyasetliri hemde "Milletler ittipaqliqi" gha munasiwetlik bir qisim mezmunlarni moy qelemde yézip chiqqanliqi, shu arqiliq Uyghur tébabet doxturxanisidiki doxturlargha "Jungxu'a medeniyitining séhriy küchini hés qildurghanliqi" alahide teswirlen'gen.

Melum bolushiche, bu xildiki xitay medeniyitini Uyghurlargha teshwiq qilish pa'aliyitining yene bir shekli ötken hepte qeshqerde ötküzülgen "Yipek yoli medeniyiti qishliq kiyim-kéchek modéllar musabiqisi" dimu eks etken. "Xitay xewerler tori" ning 21-yanwardiki xewiride bu musabiqige qatnashqan Uyghur modél qizlirining xitayche pasondiki "Chipaw" kiyimini kiyip, yelpügüch tutup maharet körsitiwatqanliqi alahide teswirlen'gen.

Uyghur modéllarning xitayche kiyimler arqiliq musabiqige chüshüshi Uyghur gödeklirining kungzi talibliriche kiydürülüshidin kéyinki yene bir hadise süpitide analizchilarning diqqitini qozghawatqanliqi melum. D u q ning bayanatchisi dilshat réshit bu heqte pikir qilip: "Bu xildiki xitay medeniyitini teshwiq qilish pa'aliyetliri Uyghurlarni basturushtiki yene bir muddi'aning mahiyette Uyghur milliy medeniyitini xitay medeniyitige assimilyatsiye qilish ikenlikini roshen halda körsitidu" dédi.

Toluq bet