Uyghur rayonida bir qisim yézilarning "Milliy alahidilikke ige yéza" dep békitilishi diqqet qozghidi

Muxbirimiz irade
2020-01-16
Élxet
Pikir
Share
Print

Uyghur aptonom rayonluq hökümet bir qisim yézilarni "Milliy alahidilikke ige yéza" dep békitish heqqide uqturush chiqarghan.

"Tengritagh tori" ning 16-yanwar küni tarqatqan xewiride töwendikiler bayan qilin'ghan: "Alaqidar bahalash telipige bina'en. . . Döletlik milletler ishliri komitéti aptonom rayon we bingtu'endiki 27 orunni 'xitaydiki az sanliq milletler alahidilikige ige yéza' qilishni békitti."

Xewerde körsitilishiche, bu 27 yéza qaramay, toqsun, kucha, sanji, bortala, ghulja, altay qatarliq jaylardiki 25 yézini öz ichige alidiken. Bingtu'en'ge qarashliq yézilardin ikkisi bar iken. Xitay hökümitining néme sewebtin bir qisim yézilarning milliy alahidilikini saqlap qélishni békitkenliki közetküchilerning diqqitini qozghidi.

Xitay hökümiti Uyghur élide 2018-yilidin bashlap "Güzel a'ile qurulushi", "Hoyla-aramlarni tazilap, pakiz muhit yaritish" qurulushi qatarliqlarni qozghash arqiliq Uyghurlarning en'eniwi turmush usulini özgertish herikiti élip barghan. Bu heriket boyiche yéza ahalilirining hoyla we öy ichidiki supa-kanglirining chuwulghanliqi, milliyche nusxidiki neqishlerning élip tashlinip, uning ornigha xitayche mesnewi we panus taqash we safa we kariwat qoyushning teshebbus qilin'ghanliqi ashkarilan'ghan idi.

Yuqiriqi ehwallargha qarighanda, xitay hökümitining herqaysi nahiyelerdin peqet bir qanche yézining milliyche alahidilikini sayahet orunliri süpitide saqlap qélip, qalghanlirini pütünley xitaychilashturushni közlewatqanliqi perez qilinmaqta.

Bu heqte mexsus tetqiqat élip barghan amérika indi'ana uniwérsitétining dotsénti timusiy grus ependi eyni chaghda radiyomizgha qilghan sözide yuqiriqidek heriketlerni 2017-yillirida bashlighan "A'ilide turidighan kadirlar siyasiti" we "Lagér tüzümi" bilen baghlinishliq bolghan we shundaqla Uyghur milliy kimlikini suslashturush omumiy siyasitining bir qismi, dep körsetken.

Toluq bet