Uyghur “Yéza éshincha emgek küchliri” rayondiki xitay déhqanlirining yerliride ishleshke orunlashturulghan

Xitay da'irilirining Uyghur “Yéza éshincha emgek küchliri” ni ishqa orunlashturush sahesini kéngeytip, Uyghur déhqanlirini rayondiki xitay köchmenlirining yerlirini térishqa yüzlendürüwatqanliqi melum. “Aqsu géziti” ning 26‏-mart xewiride ashkarilishiche, yerlik da'iriler 22‏-mart küni shayar nahiyisining qizil bayraq baziri yekshenbebazar kentide emgek küchi yermenkisi ötküzüp, emgek küchige éhtiyajliq xitay térilghu yer igilirini Uyghur “Yéza emgek küchliri” bilen teminligen. Xitay da'iriliri buni Uyghur “Yéza éshincha emgek küchliri” ning pul tépip namratliqtin qutulushi üchün zor purset, dep körsetsimu, lékin közetküchiler buning Uyghur yéza emgek küchlirini xitay térilghu yer igilirige béqindi haletke keltürüp qoyidighanliqini agahlandurmaqta. Xewerde bayan qilinishiche, yermenkide bezi Uyghur déhqanliri xitay yer igilirige yallan'ghan. Yermenkide bir xitay yer igisige yallan'ghan toxti isimlik bir Uyghur déhqan özining peqet 8. 8 Mola yéri barliqi, bu qétim ayali bilen bir xitay yer igisining 300 mo yérini térishqa yallan'ghanliqini bildürgen. Xewerde tekitlinishiche, qizil bayraq bazirining borqay kentide 1500 mo térilghu yéri bar bir xitay déhqan, yeni yer igisi bu yil 61 ishchigha éhtiyajliq ikenliki, bu yermenke özining emgek küchige bolghan éhtiyajini qandurushigha qulayliq yaritip bergenlikini tekitligen. Bu xitay yer igisining 1500 mo yerge qandaq érishkenliki melum emes. Lékin Uyghur közetküchilirining ilgiri sürüshiche, xitay da'iriliri 2017‏-yildin béri nurghun Uyghur yer igilirini yighiwélish lagérlirigha qamap, ularning achqan térilghu yerlirini musadire qilghan. Musadire qilin'ghan bu térilghu yerlerni xitay köchmenlirige we bashqilargha qaytidin bölüp bergen. Aqsu wilayiti yéqinda wilayet miqyasidiki 5 milyon 700ming modek térilghu yerning igilik hoquq tewelikini qayta békitip teqsim qilin'ghanliqini bildürgen idi. Xitay metbu'atliri 2018-yili Uyghur diyarida köpligen yerlerni igiliridin musadire qilip, tizimlap, ötküzüwalghanliqi we bu yerlerning qaytidin teqsim qilin'ghanliqini bildürgen idi. Közetküchilerning ilgiri sürüshiche, xitay hökümitining Uyghur “Yéza éshincha emgek küchliri” ni teshkillik ishqa orunlashturushi Uyghurlarni kontrol qilishtiki bir xil muqimliq tedbiri iken.