Xitay su mehsulatliri shirketliri mekit nahiyeside awstraliye chong raki yétishtürüshke bashlighan

Xitayning shendung ölkisidiki rijaw shehiridin kelgen su mehsulatliri shirkiti teklimakanning ottura qismidiki mekit nahiyeside awstraliye chong raki yétishtürüshke bashlighan. Xitay taratqulirining xewerliride, bu qurulush türining 2020-yildin bashlan'ghanliqi qeyt qilinmaqta. “Xitay xewerliri” gézitining 5-öktebir bergen bu heqtiki xewiride, rijaw shehiridiki su mehsulatliri shirkitining mekit nahiyesige xizmet guruppisi ewetip, awstraliye chong raki yétishtürüshni sinaq qilghanliqi, “Rijaw kespiy téxnika instituti” bilen élip barghan sinaqlar arqiliq, shorluq tupraqta awstraliye chong raki yétishtürüshni ishqa ashurghanliqi bildürülgen. Xewerdin melum bolushiche, 2020-yili bashlan'ghan bu qurulush türi 2021-yili 10-ayda, chong rak mehsulatlirining tunji bazargha sélinishi bilen ghelibilik bolghan.

Emma xewerde, bu qurulush türige rijaw shehiridiki qaysi shirketlerning meblegh salghanliqi we uning kölimi heqqide héchqandaq uchur bérilmigen. Halbuki, bu qurulush türi Uyghur mejburiy emgek küchlirini ishlitiwatqan xitay déngiz mehsulatliri shirketliri mekit nahiyesige kéngeydimu, dégen so'alni peyda qilmaqta. Amérikadiki béliqchiliq shirketlirini nazaret qilidighan bir tetqiqat orni, bu yilning bashlirida élan qilghan doklatida, xitayning shendung ölkisi rijaw shehiridiki déngiz mehsulatliri shirketlirining Uyghur mejburiy emgikige chétilghanliqini ashkarilighan. Amérika ana weten xewpsizliki ministirliqi bu yil 6-ayda xitayning shendung ölkisidiki déngiz mehsulatliri shirkiti bolghan “Rijaw méyjya guruhi” ni “Uyghur mejburiy emgikining aldini élish qanuni” boyiche qara tizimlikke kirgüzüp, uning mehsulatlirining amérika bazirigha kirishini chekligenidi. Nöwette, xitay su mehsulatliri shirketlirining mekit nahiyeside déngiz mehsulatlirini yétishtürüshi teklimakanning ottura qismidiki su kemchil bolghan, tebi'iy muhiti nazuk bu qurghaq nahiyening, yerlik bi'o-ékologiyesige tesir körsitip, yerlik janliq türlirining yoqilishini keltürüp chiqirishidin endishe qilinmaqta. “Xitay xewerliri” gézitining qeyt qilishiche, nöwette mekit nahiyesidiki chong rak férmisida 480 emgek küchi ishleydiken.