Xitay sayahetchilirini Uyghur rayonigha toshush wezipisi ashurup orundalghan

Xitayche “Tengritagh tori”, “Shinjang géziti” torining 12-aprél küni chiqarghan xewirige qarighanda, 2023-yil 1-aydin 3-ayghiche Uyghur rayonigha kelgen xitay sayahetchiliri 35 milyon 220 ming adem qétimgha yétip, ötken yildikidin 18.64 Pirsent ashqan.

Xitayning dölet hamiyliqidiki “Shinjang sayahetchiliki” bu yil Uyghur rayonida sayahet qilidighanlarni 200 milyon adem qétimgha yetküzüshni nishanlighan.

“Shinxu'a tori” ning ötken ayda tarqatqan xewiridin melum bolushiche, bu yil Uyghur rayonidiki sayahet qizghinliqi bir ay burun bashlan'ghan. Ussulchi qizlar ürümchi ayrodromigha chiqip ussul oynap gungdungluq sayahetchilerni kütiwalghan. “1-May bayrimi” da kélidighan sayahetchilerni kütiwélish üchün ussulchilar qeshqer, lijyang, xarbin qatarliq jaylargha öginishke ewetilgen.

Bu xewerde chiqirilghan süretlerde Uyghur rayonida sélin'ghan xitayche pasondiki muzéylar, baghchilar, rawaqlarda sayahet qiliwatqan xitaylar hemde Uyghurlar bilen xitaylar ariliship ussul oynawatqan körünüshler körsitilgen bolup, bu rayonning alliqachan “Xitay medeniyitining bir qismi” ikenliki, “Barche milletning xushal-xuram yashaydighanliqi” teshwiq qilin'ghan.

Emeliyette xitayning bu xil “Shinjang sayahetchiliki” teshwiqati irqiy qirghinchiliq bashlan'ghandin buyan dawam qilip kéliwatqan bolup, üch yil burun radiyomizning ziyaritini qobul qilghan norwégiye Uyghur komitétining re'isi bextiyar ömer bu xil teshwiqatning asasen siyasiy meqsette élip bérilidighanliqini, tashqi jehette xelq'ara bésimgha taqabil turush, ichki jehette köplep xitay sayahetchilirini Uyghur rayonigha qiziqturush üchün ikenlikini bildürgenidi.