Уйғур мусапирлириға ярдәм қилиш қанун лайиһәси америка кеңәш палатасидиму сунулди

Мухбиримиз әркин
2021-04-14
Share

Уйғур мусапирлирини қобул қилишни тезлитип, уларни хитайниң зиянкәшликидин қоғдаш тоғрисидики қанун лайиһәси америка кеңәш палатасидиму сунулған. Ройтерс агентлиқиниң хәвәр қилишичә, җумһурийәтчи кеңәш палата әзаси марко рубийо билән демократчи кеңәш палата әзаси крист кунис 14-април "уйғурларниң кишилик һоқуқини қоғдаш қанун лайиһәси" ниң йәнә бир нусхисини кеңәш палатасидиму сунған. Мәзкур қанун лайиһәси буниңдин бир қанчә һәптә аввал авам палатасида сунулған иди.

Бу қанун лайиһәсидә хитайниң зиянкәшлики түпәйли уйғур елидин қачқан уйғурларға, шуниңдәк қазақ, қирғиз қатарлиқ уйғур елидики түркий милләтләргә американиң п-2 намлиқ алдин ойлишидиған мусапирлар визиси бериш тәләп қилинған. Кеңәш палата әзаси крист кунис бу һәқтики баянатида "америка хитай хәлқ җумһурийитиниң шинҗаңдики кишилик һоқуқ дәпсәндичиликигә қарши давамлиқ сөзлиши керәк. Биз йәнә уйғурларға, диний вә етник кимлики сәвәбидин зиянкәшликкә учриған бу кишиләрниң һәммисигә капаләтлик қилишимиз вә қоғдишимиз керәк," дегән.

Ройтерс агентлиқиниң билдүрүшичә, җумһурийәтчиләр вә демократлар бу қанун лайиһәсиниң кеңәш палатасида мақуллинишиға үмидвар қаримақта икән. Бу қанун лайиһәсиниң йәнә бир нусхиси өткән ай авам палатасида сунулғандиму, униң мақуллинишида үмид барлиқи илгири сүрүлгән. Мәлум болушичә, әгәр бу лайиһә мақуллинип қанунға айланса, бу уйғур мусапирлириниң б д т ға илтимас қилмай, америка һөкүмитигә бивастә илтимас қилишиниң йолини ечип беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт