Uyghur musapirlirigha yardem qilish qanun layihesi amérika kéngesh palatasidimu sunuldi

Muxbirimiz erkin
2021-04-14
Share

Uyghur musapirlirini qobul qilishni tézlitip, ularni xitayning ziyankeshlikidin qoghdash toghrisidiki qanun layihesi amérika kéngesh palatasidimu sunulghan. Roytérs agéntliqining xewer qilishiche, jumhuriyetchi kéngesh palata ezasi marko rubiyo bilen démokratchi kéngesh palata ezasi krist kunis 14-april "Uyghurlarning kishilik hoquqini qoghdash qanun layihesi" ning yene bir nusxisini kéngesh palatasidimu sun'ghan. Mezkur qanun layihesi buningdin bir qanche hepte awwal awam palatasida sunulghan idi.

Bu qanun layiheside xitayning ziyankeshliki tüpeyli Uyghur élidin qachqan Uyghurlargha, shuningdek qazaq, qirghiz qatarliq Uyghur élidiki türkiy milletlerge amérikaning p-2 namliq aldin oylishidighan musapirlar wizisi bérish telep qilin'ghan. Kéngesh palata ezasi krist kunis bu heqtiki bayanatida "Amérika xitay xelq jumhuriyitining shinjangdiki kishilik hoquq depsendichilikige qarshi dawamliq sözlishi kérek. Biz yene Uyghurlargha, diniy we étnik kimliki sewebidin ziyankeshlikke uchrighan bu kishilerning hemmisige kapaletlik qilishimiz we qoghdishimiz kérek," dégen.

Roytérs agéntliqining bildürüshiche, jumhuriyetchiler we démokratlar bu qanun layihesining kéngesh palatasida maqullinishigha ümidwar qarimaqta iken. Bu qanun layihesining yene bir nusxisi ötken ay awam palatasida sunulghandimu, uning maqullinishida ümid barliqi ilgiri sürülgen. Melum bolushiche, eger bu layihe maqullinip qanun'gha aylansa, bu Uyghur musapirlirining b d t gha iltimas qilmay, amérika hökümitige biwaste iltimas qilishining yolini échip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet