Тәтқиқатчилар байдин һөкүмитини уйғур хәлқигә ярдәм беришкә чақирған

Вашингтондин мухбиримиз уйғар тәйярлиди
2024.05.02

Америкилиқ тәтқиқатчилардин челси соболик вә оливия әнус байдин һөкүмитини хитай коммунист партийәсиниң уйғур хәлқини қул қилишиға қарши һәрикәткә утуп, тәврәнмәс  бир ирадә билән уйғур хәлқигә ярдәм беришкә чақирған.

2024-Йили 5-айниң 2-күни дуня хиристиян инсанпәрвәрлик тәшкилатиға тәвә болған “дуняни қутқузуш” тәшкилатиниң һөкүмәт ишлири директори челси соболик вә ходсун иниститониң тәтқиқатчиси оливия әнус “дөләтлик обзор” (National Review) торида мақалә елан қилип, байдин һөкүмитини уйғурларға сөздила әмәс, техиму көп әмәлий ярдәм қилиши керәкликини илгири сүргән.

Мәзкур мақалидә, америка һөкүмитиниң үч йил илгири хитайниң “шинҗаңдики уйғур мусулманлири вә башқа милләтләргә ирқий қирғинчилиқ вә инсанийәткә қарши җинайәт садир қиливатқанлиқи” ни рәсмий етирап қилған тунҗи дөләт  икәнликини, лекин бу үч йили ичидә уйғурларниң әһвалида һеч өзгириш болмиғанлиқини илгири сүргән. Шуниң билән бир вақитта америкиниң дипломатик вә иқтисадий тәсир күчидин пайдилинип хәлқараниң қоллишини қолға кәлтүрүп, хитайни җавабкарлиққа тартиши керәкликини тилға алған.

Мәзкур мақалидә йәнә мундақ дейилгән: “америка дөләт мәҗлиси хели җиқ ишларни қилди, әмди байдин һөкүмити уйғурларниң һәқ-һоқуқини қоғдаш вәдисини чоқум әмәлгә ашуруши керәк; хитай коммунист партийәсиниң уйғур хәлқини қул қилишиға қарши күчлүк һәрикәткә өтүши керәк. Һазир тәврәнмәс бир ирадә билән уйғур хәлқигә ярдәм беридиған пәйт кәлди. Әгәр америка бундақ қилмиса, америкиниң қиммәт қаришиға хиянәт қилған болиду, шундақла хитайниң зулуми астида азаб чекиватқан милйонлиған кишиләргә еғир зиян салған болиду”. 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.