«Шинҗаңға ярдәм бериш» намида он миң оқутқучи уйғур елигә әвәтилидикән

Мухбиримиз ирадә
2020-01-09
Елхәт
Пикир
Share
Принт

Шаңхәй шәһиридин «шинҗаңға ярдәм бериш» намида йәнә бир түркүм хитай оқутқучилар уйғур елигә әвәтилидикән.

«Тәңритағ тори» ниң бу һәқтики хәвиригә қариғанда, 6-январ күни шаңхәй шәһәрлик маарип идариси «тибәткә вә шинҗаңға он миң оқутқучи арқилиқ ярдәм бериш пилани» намлиқ бир йиғин чақирған.

2017-Йили хитай маарип министирлиқи, хитай дөләтлик тәрәққият вә ислаһат комитети, малийә министирлиқи қатарлиқ орунлар бирлишип мәхсус уқтуруш тарқитип «чегра районларниң узақ мәзгиллик әминлики үчүн шинҗаң вә тибәткә он миң оқутқучи әвәтиш қарари» ни елан қилған иди. Шаңхәй шәһириниң юқириқи бу хизмәт йиғини мана шу қарарниң бир парчиси икән.

Диққәт қозғайдиғини шуки, тунҗи түркүмдә сәпәргә чиқидиған 185 оқутқучиниң 170 нәпири уйғур елигә барса, аран 15 нәпирила тибәткә баридикән. «Тибәт вә шинҗаңға он миң оқутқучи арқилиқ ярдәм бериш пилани» ниң асаслиқ нишаниниң уйғур райони икәнлики мәлум.

«Тәңритағ тори» ниң хәвиридә шаңхәйдин уйғур елигә баридиған тунҗи түркүмдики 170 нәпәр оқутқучиниң қәшқәр вилайитиниң йәркән, поскам, қағилиқ вә маралбеши қатарлиқ төт наһийәси тәвәсидики 15 оттура-башланғуч мәктәпләргә әвәтилидиғанлиқини билдүргән.

Шаңхәй шәһири өткән йили 10-айда қәшқәрдә «шинҗаңға нишанлиқ ярдәм бериш маарип гуруһи» ни қуруп чиққан. Бу органниң қурулуш мурасими 2019-йили 16-өктәбир күни қәшқәрдә өткүзүлгән болуп, «қәшқәр хәвәр тори» бу һәқтики хәвиридә «шаңхәй шәһириниң қәшқәрдә маарип гуруһи қуруши-қәшқәрдики маарип сүпитини юқири көтүрүп, һәрбир пәрзәнтни милләтләр иттипақлиқини қоғдайдиған авангарт майсилардин қилип тәрбийәләп, йеңичә вәзийәттики йеңичә тәләпни қандуруп, узун муддәтлик капаләтни бәрпа қилиду,» дәп тәриплигән иди.

Хитай һөкүмитиниң уйғур елиниң җәнубини асас қилған һалда түркүм-түркүмләп оқутқучи йөткиши бу җайларда тез сүрәттә хитайлаштурушни ишқа ашуруш, болупму һазирқидәк ата-анилири лагерға қамалған он миңлиған уйғур балилири йетимханиларға йиғивелинған пәйттә бу балиларни хитай маарипида тәрбийәләшкә мунасивәтлик болуши мумкин, дегән пәрәзләрни пәйда қилмақта.

Пикирләр (0)
Share
Толуқ бәт