"Shinjanggha yardem bérish" namida on ming oqutquchi Uyghur élige ewetilidiken

Muxbirimiz irade
2020-01-09
Élxet
Pikir
Share
Print

Shangxey shehiridin "Shinjanggha yardem bérish" namida yene bir türküm xitay oqutquchilar Uyghur élige ewetilidiken.

"Tengritagh tori" ning bu heqtiki xewirige qarighanda, 6-yanwar küni shangxey sheherlik ma'arip idarisi "Tibetke we shinjanggha on ming oqutquchi arqiliq yardem bérish pilani" namliq bir yighin chaqirghan.

2017-Yili xitay ma'arip ministirliqi, xitay döletlik tereqqiyat we islahat komitéti, maliye ministirliqi qatarliq orunlar birliship mexsus uqturush tarqitip "Chégra rayonlarning uzaq mezgillik eminliki üchün shinjang we tibetke on ming oqutquchi ewetish qarari" ni élan qilghan idi. Shangxey shehirining yuqiriqi bu xizmet yighini mana shu qararning bir parchisi iken.

Diqqet qozghaydighini shuki, tunji türkümde seperge chiqidighan 185 oqutquchining 170 nepiri Uyghur élige barsa, aran 15 nepirila tibetke baridiken. "Tibet we shinjanggha on ming oqutquchi arqiliq yardem bérish pilani" ning asasliq nishanining Uyghur rayoni ikenliki melum.

"Tengritagh tori" ning xewiride shangxeydin Uyghur élige baridighan tunji türkümdiki 170 neper oqutquchining qeshqer wilayitining yerken, poskam, qaghiliq we maralbéshi qatarliq töt nahiyesi tewesidiki 15 ottura-bashlan'ghuch mekteplerge ewetilidighanliqini bildürgen.

Shangxey shehiri ötken yili 10-ayda qeshqerde "Shinjanggha nishanliq yardem bérish ma'arip guruhi" ni qurup chiqqan. Bu organning qurulush murasimi 2019-yili 16-öktebir küni qeshqerde ötküzülgen bolup, "Qeshqer xewer tori" bu heqtiki xewiride "Shangxey shehirining qeshqerde ma'arip guruhi qurushi-qeshqerdiki ma'arip süpitini yuqiri kötürüp, herbir perzentni milletler ittipaqliqini qoghdaydighan awan'gart maysilardin qilip terbiyelep, yéngiche weziyettiki yéngiche telepni qandurup, uzun muddetlik kapaletni berpa qilidu," dep teripligen idi.

Xitay hökümitining Uyghur élining jenubini asas qilghan halda türküm-türkümlep oqutquchi yötkishi bu jaylarda téz sür'ette xitaylashturushni ishqa ashurush, bolupmu hazirqidek ata-aniliri lagérgha qamalghan on minglighan Uyghur baliliri yétimxanilargha yighiwélin'ghan peytte bu balilarni xitay ma'aripida terbiyeleshke munasiwetlik bolushi mumkin, dégen perezlerni peyda qilmaqta.

Toluq bet