Shendungdiki bir aliy mektep yéqinqi 5 yilda qeshqerge 1800 din artuq oqutquchi-oqughuchi ewetip bolghan

2017-Yilidin bashlap Uyghur ma'arip sépigha qarita keng kölemlik tazilash élip barghan xitay hökümiti, ichkiri ölkilerdin nurghun xitaylarni yötkep chiqip, tazilashta Uyghurlardin bosh qalghan orunlargha keng kölemde sepligen idi. Xitay taratqulirining ashkarilishiche, Uyghur diyarining ma'arip sépigha xitaylarni seplesh herikiti hazirmu dawam qilmaqta iken.

2018-Yildin béri xitayning shendung ‍ölkisidiki bir aliy mektepning özidinla “Nishanliq yardem bérish” namida qeshqerge “Oqutquchiliq” üchün yötkep kélin'gen xitay oqughuchilirining sani 1800 ashqan. “Shendung ma'arip téléwizyesi” qanilining ashkarilishiche, 2018-yili 8-aydin bashlap shendungning zawju'ang shehiridiki “Zawju'ang instituti” din her yili ikki türkümde mektep püttürgen 200 oqughuchi, 4 neper yétekchi oqutquchining bashchiliqida qeshqerge “Oqutquchiliq” qilish üchün yötkep kélin'gen.

Xewerlerde, az kem 6 yil ichide bu instituttin qeshqerge yötkelgen oqughuchilarning 1800 din ashqanliqi, bu kishilerning qeshqerdiki her qaysi ottura-bashlan'ghuch mekteplerde oqutquchiliq qilip, özini “Wetenning eng éhtiyajliq jayliri” gha atighanliqi tekitlenmekte. Lékin “Shendong ma'arip téléwiziyesi” qanilining xewiride ashkarilishiche, qeshqerge ewetilgen bu kishilerning wezipisi “Oqutquchiliq” bilen cheklenmigen. Ular yerlik balilargha xitay tili, tarixi we medeniyitini singdürüsh bilen bir waqitta, “Beshke kirish” pa'aliyitige qatniship, ahaliler komitétigha, yéza-kentlerge we hetta a'ililergiche kiridiken.

Xewerde, “Zawju'ang instituti” edebiyat fakultétining mu'awin partiye sékrétari söz qilip, “Beshke kirish” ning mektep, ‍idare-jem'iyet, ahaliler komitéti, yéza-kent we a'ililerge kirish ikenliki, bu kishilerning “Beshke kirish” arqiliq yerlik ahaliler we bir qisim oqutquchilarning dölet tili sewiyesini östürüshke yardem qilidighanliqini éytqan. Xitay hökümiti 2017-yili bashlap Uyghur ma'arip sépini tazilash bilen bir waqitta, Uyghur tilinimu ma'arip sépidin siqip chiqarghan idi.