Uyghur rayonidiki shirketler xitay ölkiliridin atalmish “Ixtisasliqlar” ni qobul qilishqa bashlighan

Uyghur aptonom rayonluq da'iriliri yéqinda xitayning xubiy, gensu, sichüen we xénen ölkiliridiki aliy mektep püttürgen xitay oqughuchilarni Uyghur élige kélip ishqa orunlishishqa jelp qilish üchün, mexsus ömek teshkilligen.

Xitayning “Tengritagh tori” ning xewirige qarighanda, “Ixtisasliqlar” dep atiliwatqan bu xitay aliy mektep oqughuchiliri ürümchi, qeshqer, aqsu, qomul we bayin'gholin aptonom oblasti qatarliq wilayet-oblastlardiki dölet we xususiy igilikidiki 22 shirket we karxanigha qobul qilinidiken. Bu orunlar néfit qurulushi, dorigerlik, éléktron qurulushi, mashina, yol we köwrük qurulushi qatarliq sahelerge chétilidighan kespiy sahelerdin teshkil tapidiken.

Xewerde xizmet izdewatqan bu xitay yashlarning aktipliq bilen xizmetke tizimlatqanliqi tilgha élin'ghan, shundaqla “Shinjangning ghayet zor tereqqiyat boshluqi we mukemmel parawanliq sistémisi nurghun xizmet izdigüchilerni qatnishishqa jelp qildi” déyilgen.

Xitay hökümiti Uyghur élide 2017-yilidin bashlap zor kölemlik tutqunni yolgha qoyup, Uyghurlarning her sahe we her xil yashtiki yétishken ziyaliylirini lagérlargha solighan. Andin ularning orunlirini toldurush üchün xitayning ichkiy ölkiliridin “Ixtisasliqlar” namidiki köchmen yötkesh ishlirini hessilep ashurghan idi. Yéqindin buyan xitay hökümiti Uyghur rayonini xitayning énérgiye, éléktir, ashliq, déhqanchiliq we charwichiliq mehsulatliri we paxta bazisigha aylandurush chaqiriqini kücheytip, téximu köp xitay yashlirini Uyghur rayonigha yerleshtürüshke, Uyghurlarning rayondiki nopus üstünlükini chökürüshke kirishkenliki melum bolmaqta.