Хитай өлкилиридә оқуш пүттүргән хитай оқуғучиларни уйғур елида йәрлишишкә сәпәрвәрлик қилиш хизмити башланған

Мухбиримиз ирадә
2019-04-12
Елхәт
Пикир
Share
Принт

Хитай һөкүмити уйғур елигә хитай өлкилиридин адәм йөткәшни тезләштүрүш үчүн мәхсус уйғур елигә қаритилған «алий мәктәп оқуғучилирини ғәрбий районда мулазимәт қилишқа сәпәрвәрлик пилани» ни рәсмий башливәткән.

«Шинҗаң гезити» ниң бу һәқтики хәвиригә қариғанда, хитай өлкилиридин уйғур елигә бериш үчүн тизимлатқан алий мәктәп оқуғучилири уйғур елидики 14 вилайәт вә оласт, 74 наһийә вә шәһәргә орунлаштурулидикән. Тизимлаш хизмити 6-айғичә давам қилидикән.

Мәзкур пиланни хитай коммунистик яшлар иттипақи мәркизий комитети, хитай маарип министирлиқи, малийә министирлиқи, кадирлар министирлиқи қатарлиқ органлар бирликтә уюштурған болуп, бу йиллиқ қобул қилиш нишани 4000 нәпәр икән. Мәзкур пилан бойичә һазирғичә уйғур елигә келип орунлашқан хитай алий мәктәп оқуғучилири 20 миң нәпәрдин ашидикән.

Бу һәқтики хәвәрдә уйғур елигә келип ишләшни таллиған хитай оқуғучилириниң турмуш, ятақ вә тамақ қатарлиқ җәһәтләрдики етибар бериш сиясәтлири вә шундақла нурғун қошумчә ярдәм пуллиридин бәһримән болидиғанлиқи әскәртилгән.

Хитай даирилири уйғур елигә түрлүк намлар астида хитай көчмәнлирини йөткәшни изчил давамлаштуруп кәлмәктә. Уйғур елида 2017-йили лагер түзүми йолға қоюлуп, 2 милйонғичә уйғур вә қазақ қатарлиқ йәрлик хәлқләр лагерға қамалғандин буян хитай өлкилиридин адәм йөткәш салмиқиниң йәниму күчәйгәнлики мәлум.

Көзәткүчиләрниң қаришичә, нөвәттә уйғур елидики һәрқайси наһийә тор бәтлириниң хитай өлкилиридин ишчи-хизмәтчи вә сақчи хадими қобул қилиш һәққидики еланлар билән тошуп кетиши буни испатлап беридикән.

Пикирләр (0)
Share
Толуқ бәт