Лопнур наһийәсидә 3000 мо кевәз терип, һәр модин 300 килограм пахта алидиған хитай яшлири пәйда болған

Мухбиримиз җәвлан
2021-05-05
Share

Хитай таратқулириниң тәшвиқ қилишичә, йеқинда лопнур наһийәсидә 90-йиллардин кейин туғулған икки хитай, заманиви техникилардин пайдилинип 3000 мо кевәз терип, һәр модин 300 килограм пахта алидиғанлиқи тоғрулуқ җәң елан қилишқан.

Хәвәрдә ейтилишичә, "йеңилиқ яритиш роһиға толуп ташқан" бу икки хитай, тупрақ нәмлики вә униң температурисини өлчәштин тартип кевәз териш вә пахта йиғишқичә толуқ аптоматлашқан әқлий иқтидарлиқ йеза игилик машинилирини ишқа селип, һәр бир мо кевәздин 300 килограм пахта алидиғанлиқи тоғрулуқ риқабәт елан қилишқан. 3000 Мо йәргә әнәниви усулда кевәз териш вә пахта йиғишқа адәттә 30 әмгәк күчи кетидиған болуп, әгәр толуқ машинилишиш әмәлгә ашурулса, униңға адәм күчи кәтмәйдикән. Нөвәттә, лопнур наһийәсидә 1 милйон 200 миң мо кевәз мәйдани болуп, кевәз теришни машинилаштуруш сәвийәси 96 пирсәнткә йәткән.

Көзәтчиләрниң қаришичә, хитай һөкүмити йеқинқи йиллардин бери уйғур районида йеза игиликни машинилаштуруш сүритини шиддәт билән ашуруп, көплигән деһқанларниң вә бирқисим кевәз териш билән шуғуллинип игилик тикләватқанларниң йәрлирини "йәрләрни қайтидин өлчәп тәқсим қилиш" дегәндәк намлар билән йиғивелип, әнәниви териқчилиқ шәклини бикар қилип, биңтуәнни мәркәз қилған һәмдә санаәт-кархана билән етиз-мәйданни бирләштүргән ишләпчиқириш қурулмиси бәрпа қилған. Лопнур наһийәсидә пәйда болған бу хитай яшлириниң диққәт қозғиши вә һөкүмәтниң қоллишиға еришиши хитайниң йеңи бир әвладлирини уйғур диярида маканлишиш, халиғанчә игидарчилиқ қилиш вә байлиқ топлашқа илһам бериватқанлиқини көрситидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт