Uyghur aptonom rayoni bu yil xitaydin 9 mingdek oqutquchi qobul qilishni pilan'gha kirgüzgen

Uyghur aptonom rayonluq ma'arip nazariti bu yil ichide xitayning memliket miqyasidin 9 mingdek ottura-bashlan'ghuch we yesli oqutquchisi qobul qilishni pilan'gha kirgüzgen.

Xitay taratqulirining ashkarilishiche, qobul qilinidighan oqutquchilarning az kem 5500 nepiri, yeni omumi sanning 62% i Uyghur élining jenubidiki qeshqer, xoten, qizilsu qatarliq 3 wilayet, bir oblastqa qobul qilinidiken.

“Shinjang géziti” ning 7‏-iyun bergen bu heqtiki xewiride 8837 neper oqutquchining 1842 nepirining yesli, 4058 nepirining bashlan'ghuch, qalghan qismining toluq we toluqsiz toluqsiz ottura mekteplerge qobul qilinidighanliqini bildürgen. Bu xitay da'irilirining 2017‏-yili 2‏-aydin bashlap Uyghur, qazaq we rayondiki bashqa türki milletlerni keng kölemlik tutqun qilip, lagérlargha qamashqa bashlighandin buyan mezkur rayonning ma'arip sistémisigha zor türkümde oqutquchi qobul qilish heriketlirining biridur.

Uyghur kishilik hoquq teshkilatlirining ilgiri sürüshiche, xitay hökümitining keng kölemlik tutqun qilish herikitide nurghun Uyghur oqutquchilarning tutqun qilinip lagérlargha qamilishi rayonda oqutquchilar qoshunidiki zor boshluqni peyda qilghan iken. Bu yene nurghun Uyghur balilirining qaranchuqsiz qélip yataqliq yitimlar mekteplirining oqutquchilar qoshunigha bolghan éhtiyajini zor derijide ashuruwetken.

Közetküchiler, nöwette xitay hökümitining memliket miqyasidin zor türkümde oqutquchi qobul qilip, bu boshluqni tolduruwatqanliqini ilgiri sürmekte. Amérika dölet mudapiye ministirliqining ilgiri sürüshiche, nöwette 3 milyondek Uyghur, qazaq we bashqa az sanliq milletler yighiwélish lagérlirida tutup turulmaqta iken. “Shinjang géziti” ning xewerde qeyt qilinishiche, bu yilliq oqutquchi qobul qilish xizmiti 8‏-ayning axirlirida axirlishidiken.