Turpan shehiri bir tümen'ge yéqin atalmish “Ixtisas igisi” qobul qilghan

• Muxbirimiz sada
  2019-06-12

11-Iyun küni turpan sheherlik hökümet torida rayon'gha atalmish “Ixtisas igiliri” ni qobul qilish heqqide bir xewer bésilghan.

Xewerde déyilishiche, 2017-yilidin buyan turpan shehirining ma'arip, qanun we dawalash sahelirige qobul qilin'ghan adem 9892 neper bolup, buning ichide xitayning xunen ölkisidin qobul qilin'ghan ademla 1000 neperdin artuq bolghan.

Xewerde yene yerlik hökümetning bu atalmish “Ixtisas igiliri” ni rayonda tutup qélish üchün turalghu öy, xizmet muhiti we bashqa herqaysi jehetlerdiki parawanliq siyasetlirini kücheytkenliki bayan qilin'ghan. Buning tipik misali turpan'gha yéngidin 830 yürüsh turalghu bina salghan.

Xitay hökümiti ötken mezgilde Uyghur diyaridiki Uyghur yashlarni atalmish “Yéza éshincha emgek küchi” namida xitay ölkilirige yötkep, oxshash bir waqitta xitay ölkiliridin xitaylarni Uyghur rayonigha yötkigen idi. Emdilikte xitay ölkiliridin minglap, tümenlep atalmish “Ixtisas igiliri” ni Uyghur diyarigha yötkilishi diqqet qozghimaqta.

Közetküchilerning bildürüshiche, xitay hökümitining bu qilmishi rayondiki Uyghur nopusini shalanglashturup, xitay millitini rayonning asasliq ahalisige aylandurush urunushining roshen ipadisi iken.