Xitayning tibettiki bir herbiy qismi xoten shehirige yötkelgen

Muxbirimiz sada
2019-07-10
Élxet
Pikir
Share
Print

Yéqinda xitay azadliq armiyesining tibet aptonom rayonidiki bir herbiy qismining zembirekchiler etriti atalmish heqiqiy "Jeng manéwiri" ötküzüsh namida Uyghur aptonom rayonining xoten shehirige yötkelgen.

Xitayning hökümet awazi bolghan "Yershari waqti" gézitining 7-iyuldiki xewirige qarighanda, bu zembirekchiler etriti ikki etretke bölünüp, bir-birige qarshi atalmish "Jeng manéwiri" élip baridiken. Bu "Manéwir" ning axirqi nishani herbiy qoshunning heqiqiy jeng qilish iqtidarini yétildürüsh iken.

Xewerdin melum bolushiche, xitay merkiziy téléwiziye istansisi shu küni tibet aptonom rayonining paytexti lxasadin ayrilghan bu zembirekchiler qismining xoten shehirige 10 kün burunla kirip bolghanliqi heqqide xewer bergen.

Xitay merkiziy téléwiziye istansisining xewiride bu ikki etretning kelgüsi bir nechche künlerdimu yene köpligen "Manéwir" larni élip baridighanliqini, buning axbarat razwédkisi, jeng pilani we yiraq ariliqtin zembirek arqiliq oqqa tutush qatarliq meshiqlerni öz ichige alidighanliqi éytip ötülgen.

"Yershari waqti" gézitining xewiride chégra rayonliri bolghan tibet we Uyghur rayonida herbiy "Manéwir" larning élip bérilishi xitay azadliq armiyesining döletning zémin pütünlükini qoghdash iqtidarini östürüshke paydisi bolidighanliqi tilgha élin'ghan.

Yéqinqi mezgillerde Uyghur diyarida ziyarette bolghan we shu yerde xizmet qilidighan chet'ellikler rayonni xitayning herbiy aptomobillirining qaplap ketkenliki, tankilarning da'im uchrap turidighanliqi, kochilarni charlaydighan xitay herbiylerning qorallirini ésiwalidighanliqi heqqide radiyomizgha melumat bergenidi. Emdilikte xitay taratqulirida yuqiriqidek xewerlerning élan qilinishi analizchilarning diqqitini qozghidi.

Uyghur közetküchilirining bildürüshiche, xitay hökümitining Uyghur rayonida atalmish "Jeng manéwiri" élip bérishi, öz qoralliq küchlirining heywisini körsitishi "Muqimliqni qoghdash" nami astida rayondiki yerlik ammini, yeni Uyghurlarni héchqandaq naraziliq inkaslirini bildürelmey, özige mutleq boysunidighan haletke keltürüsh ikenlikini otturigha qoymaqta.

Toluq bet