Qeshqerde qurulghan “Ishqa orunlashturush mulazimet merkizi” deslepki qedemde 10 ming xitayni ishqa alghan

Yillardin béri ichkiri xitaydin adem ekélip, Uyghur rayonidin “Éshincha emgek küchliri” ni ichkiri xitaygha yötkewatqan xitay hökümiti, ürümchide aptonom rayonluq “Ishqa orunlashturush merkizi” qurghan bolup, qeshqer qatarliq jaylardimu bu xil mulazimet merkezliri qurup, shendung qatarliq ölkilerdin “Téxnik xadimlar” ni qobul qilmaqta iken.

“Shinjang géziti” tori, “Tengritagh tori” ning 23-iyul chiqarghan xewiridin qarighanda, 7-ayning 22-, 23-künliri qeshqerde “Shendung-shinjang adem küchi bayliqi orunlirining ixtisasliqlarni toluq ishqa orunlashturush yürüshlük pa'aliyiti” bashlan'ghan. Shendung bilen Uyghur élining adem küchi bayliqi nazariti, shendung “Shinjanggha yardem bérish xizmiti” qomandanliq shitabi, qeshqer wilayetlik memuriy mehkime qatarliq orunlar birliship ötküzgen bu pa'aliyette, xizmet telep qilghuchilargha 10 mingdin köp ish orni teminlen'gen.

Pa'aliyet mezgilide shendung ölkisi yene qeshqerde “Aliy mektepni püttürgen oqughuchilarni ishqa orunlashturush bazisi” qurup, shendungdin dawamliq “Ixtisasliq xadim” mangdurush yolini achqan.

Uyghur aptonom rayonluq “Ishqa orunlashturush merkizi” mes'ulining bildürüshiche, bu qétimqi pa'aliyet Uyghur éli bilen ichkiri xitayning öz'ara adem yötkesh tejribisini almashturush sehnisi bolup, “Shinjang xelqini ichkiri xitaygha bérip ishleshke, ichkiri xitaydikilerni shinjanggha kélip igilik tikleshke ilhamlandurush” meqset qilin'ghan iken.

Xitay hökümitining “Shinjangdin adem chiqirish, ichkiridin adem kirgüzüsh” siyasiti eslide xitay kompartiyesining bash sékrétari shi jinpingning yolyoruqi bolup, adriyan zénzning qeyt qilishiche, shi jinping 2014-yil qilghan bir qétimliq sözide, Uyghurlarning öz ana wetinide nopus jehettiki üstünlükini ajizlitish üchün ularni “Yötkep assimilyatsiye qilish” ni qollighan iken. Shi jinping 2023-yil 8-ayning axirliri jenubiy afriqadin qaytip ürümchide toxtap ötkende, yene shu siyasitini qayta tekitligenliki xewer qilin'ghanidi.