Aqsu wilayitige ichkiridin ikki ming kadir qobul qilish ghulghula qozghidi

Muxbirimiz eziz
2020-08-05
Élxet
Pikir
Share
Print

Milyonlighan Uyghurning lagérlargha qamilip ghayet zor rohiy we jismaniy qiynaqlargha duch kéliwatqanliqi pütün dunyagha melum boluwatqanda aqsu wilayetlik hökümet "Aqsu wilayitining 2020-yili oqush püttürgen aliy mektep oqughuchilirini ishqa orunlashturush layihesi" ni élan qildi.

Xitay hökümiti bashqurushidiki shinxu'a agéntliqining 5-awghusttiki xewiride éytilishiche, bu layihe boyiche ikki mingdin artuq aliy mektep oqughuchisi "Üchke yölek bolush, birni qollash" chaqiriqi boyiche kespiy orunlarni öz ichige alghan 109 idarige kadirliqqa qobul qilinidiken. Bu türkümde xizmetke qobul qilin'ghanlargha ma'ash we türlük sughurta jehette zor étibar qilinidighan bolup, ma'ashtin sirt her bir kishige yiligha 40 ming som (texminen alte ming amérika dolliri) turmush qoshumche yardem puli bérilidiken. Xewerde buning aliy mektepni püttürgen oqughuchilarni tézrek xizmetke orunlashturush yüzisidin otturigha chiqqan tedbir ikenliki tekitlinidu.

Halbuki muhajirettiki Uyghur pa'aliyetchiliri bu tedbirlerni tenqidlep, buning ashkara halda mustemlikichilik siyasitining mahiyitini namayan qilghanliqini körsetti. Amérikadiki közetküchi ilshat hesenning pikriche, bu halni xitay hökümitining Uyghur yashlirini "Éshincha emgek küchi" dégen bahanide xitay zawutlirigha ayda nechche yüz somluq ma'ashqa yallap élip kétishi hemde aliy mektepni püttürgen minglighan Uyghur oqughuchilarning ishsiz yaki lagérgha qamalghan haliti bilen sélishturghanda mesilining mahiyiti asanla pash bolidiken. Bolupmu milyonlighan Uyghurlar "Mejburiy emgek" ning qurbani bolup heqsiz yaki intayin töwen ish heqqi bilen "Zamaniwi qullar emgiki" ni dawam qiliwatqanda aqsu wilayitining bunche köp sandiki xitay kadirni yuqiri ma'ash we bashqa alahide teminat bilen xizmetke élish emeliyette aqsudiki Uyghurlarni bashquridighan "Emeldarlar qoshuni" ni téximu zoraytidiken. U mushu ehwallargha asasen "Roshenki, ikki ming kadirni biraqla ishqa élish chaqiriqi emeliyette aqsudiki kespiy orunlardin qanchilik ademning sirliq halda ghayib bolghanliqini, nöwette xitay hakimiyitining sherqiy türkistan'gha nopus yötkesh istratégiyisining qaysi yönülüshke qarap méngiwatqanliqini eng janliq körsitip béridu" dédi.

Toluq bet