Xitay Uyghur diyarining jenubida 140 ming nopus bashqa jaygha köchürgen

• Muxbirimiz sada
  2019-09-12

Xitay da'irilirining “Namratliqtin qutquzush” namida élip bériwatqan Uyghur diyarining jenubidiki üch wilayet bir oblasttiki yerlik ahalilerni bashqa jaylargha köchürüsh pilani téz sür'et bilen ijra qilinmaqta iken.

Shinxu'a torining 12-séntebirdiki xewirige qarighanda, xitay merkizi hökümitining maliye yardimi bilen élip bériliwatqan bu qurulushta 3 wilayet we bir oblast hem bashqa jaylardiki ahalidin 159 ming 100 ahale “Namratlarni yölesh” namidiki emin öyge köchürülüsh pilanlan'ghan bolup, buning üchün 9 milyard 517 milyon yüen ajritilghan. 2016-2018-Yilghiche bolghan üch yil ichide jem'iy 140 ming ahale köchürülüp bolun'ghan.

Xewerdiki qiziq nuqtilarning biri xitay da'irilirining a'ile köchürüshige seweb bolghan amillarning namrat rayon dep atiwalghan bu 3 wilayet we bir oblastta “Su menbesi qisliqi”, “Yerlirining chölliship kétish” bilen birge yene bu jaylarda “Az sanliq milletlerning nopusining yuqiri salmaqni igileydighanliqi” alahide tekitlen'gen.

Bu heqte otturigha chiqqan bezi inkaslarda xitay da'irilirining atalmish “Emin öyge köchürüsh” xizmiti nuqtiliq Uyghurlargha qaritilghanliqi ularning öz éghizi arqiliq ashkariliniwatqanliqi ilgiri sürülmekte.

Xitay da'iriliri hazirgha qeder “Emin öy qurulushi” ni “Namratlarni köchürüsh arqiliq yölesh” qurulushi dep teshwiq qilip kelgen idi. Biraq chet'ellerdiki Uyghur közetküchilerdin amérika Uyghur birleshmisining re'isi élshat hesen ependi buni, “Uyghurlarni öy-makanliridin ayrishni we tarqaqlashturushni meqset qilghan qurulush”, dep qarimaqta. Xitay metbu'atining xewer qilishiche, qaghiliq nahiyesining qaraqurum taghliqigha tutash qedimiy Uyghur chipan yézisining ahalisi öz makanliridin köchürülgen.