Хитай уйғур дияриниң җәнубида 140 миң нопус башқа җайға көчүргән

Мухбиримиз сада
2019-09-12
Елхәт
Пикир
Share
Принт

Хитай даирилириниң «намратлиқтин қутқузуш» намида елип бериватқан уйғур дияриниң җәнубидики үч вилайәт бир областтики йәрлик аһалиләрни башқа җайларға көчүрүш пилани тез сүрәт билән иҗра қилинмақта икән.

Шинхуа ториниң 12-сентәбирдики хәвиригә қариғанда, хитай мәркизи һөкүмитиниң малийә ярдими билән елип бериливатқан бу қурулушта 3 вилайәт вә бир област һәм башқа җайлардики аһалидин 159 миң 100 аһалә «намратларни йөләш» намидики әмин өйгә көчүрүлүш пиланланған болуп, буниң үчүн 9 милярд 517 милйон йүән аҗритилған. 2016-2018-Йилғичә болған үч йил ичидә җәмий 140 миң аһалә көчүрүлүп болунған.

Хәвәрдики қизиқ нуқтиларниң бири хитай даирилириниң аилә көчүрүшигә сәвәб болған амилларниң намрат район дәп ативалған бу 3 вилайәт вә бир областта «су мәнбәси қислиқи», «йәрлириниң чөллишип кетиш» билән биргә йәнә бу җайларда «аз санлиқ милләтләрниң нопусиниң юқири салмақни игиләйдиғанлиқи» алаһидә тәкитләнгән.

Бу һәқтә оттуриға чиққан бәзи инкасларда хитай даирилириниң аталмиш «әмин өйгә көчүрүш» хизмити нуқтилиқ уйғурларға қаритилғанлиқи уларниң өз еғизи арқилиқ ашкарилиниватқанлиқи илгири сүрүлмәктә.

Хитай даирилири һазирға қәдәр «әмин өй қурулуши» ни «намратларни көчүрүш арқилиқ йөләш» қурулуши дәп тәшвиқ қилип кәлгән иди. Бирақ чәтәлләрдики уйғур көзәткүчиләрдин америка уйғур бирләшмисиниң рәиси елшат һәсән әпәнди буни, «уйғурларни өй-маканлиридин айришни вә тарқақлаштурушни мәқсәт қилған қурулуш», дәп қаримақта. Хитай мәтбуатиниң хәвәр қилишичә, қағилиқ наһийәсиниң қарақурум тағлиқиға туташ қәдимий уйғур чипан йезисиниң аһалиси өз маканлиридин көчүрүлгән.

Пикирләр (0)
Share
Толуқ бәт