Хитай даирилири йеқинқи 4-5 йилда ақсу вилайитигә 21 миң хитай оқутқучи қобул қилған

Мухбиримиз әркин
2020-12-11
Share

Хитай даирилириниң йеқинқи 4-5 йил ичидә уйғур елидики мәктәпләргә ичкири өлкиләрдин зор көләмдә оқутқучи йөткәп чиққанлиқи мәлум болди. Бу хитай даирилириниң уйғур тилини омумйүзлүк чәкләп, хитай тилини райондики бирдин-бир маарип тилиға айландурған, миңлиған уйғур оқутқучиларни маарип сепидин тазилап чиқарған, бәзилирини лагер вә түрмиләргә қамиған бир мәзгилдә йүз бәргән. "ақсу гезити" ниң 11-декабирдики хәвиридә ашкарилинишичә, бу мәзгил ичидә ақсу вилайитиниң өзигә 21 миң оқутқучи тәклип қилинған.

Хәвәрдә, буниң 13-бәш йиллиқ пилан мәзгилидә йүз бәргәнлики, "йеңи оқутқучиларниң наһийә базирида өйи, йеза-базарда ятиқи болуш асаси җәһәттин ишқа ашқанлиқи" тәкитләнгән. Хәвәрдә баян қилинишичә, йәрлик даириләр тәклип қилинған оқутқучиларни ақсуда тутуп қелиш үчүн уларниң олтурақ өй вә тәминатини көрүнәрлик юқири көтүргән. Лекин көзәткүчиләрниң тәкитлишичә, хитай даирилириниң уйғур елиға ичкири өлкиләрдин зор көләмлик оқутқучи тәклип қилиши униң 2017-йилдин башлап техиму кәскинләшкән "мәдәнийәт қирғинчилиқи" ниң бир парчиси икән.

Хитай һөкүмити 2017-йили башланған чоң тутқунда уйғур тили дәрсликини бирдәк бикар қилип, мәктәп, идарә-җәмийәт, аммиви сорунларда уйғур тилида сөзләшни чәклигән. Уйғурларниң нурғун әдәбият, тарих оқутқучилирини лагерларға қамап, ата-анисиз қалған йүз миңлиған уйғур пәрзәнтлирини "ятақлиқ мәктәп" намидики йетимханилириға йөткигән. Кишилик һоқуқ тәшкилатлири хитайниң бу һәрикитини "ирқий қирғинчилиққа ятиду" дәп әйиблигәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт