Xitay da'iriliri yéqinqi 4-5 yilda aqsu wilayitige 21 ming xitay oqutquchi qobul qilghan

Muxbirimiz erkin
2020-12-11
Share

Xitay da'irilirining yéqinqi 4-5 yil ichide Uyghur élidiki mekteplerge ichkiri ölkilerdin zor kölemde oqutquchi yötkep chiqqanliqi melum boldi. Bu xitay da'irilirining Uyghur tilini omumyüzlük cheklep, xitay tilini rayondiki birdin-bir ma'arip tiligha aylandurghan, minglighan Uyghur oqutquchilarni ma'arip sépidin tazilap chiqarghan, bezilirini lagér we türmilerge qamighan bir mezgilde yüz bergen. "Aqsu géziti" ning 11-dékabirdiki xewiride ashkarilinishiche, bu mezgil ichide aqsu wilayitining özige 21 ming oqutquchi teklip qilin'ghan.

Xewerde, buning 13-besh yilliq pilan mezgilide yüz bergenliki, "Yéngi oqutquchilarning nahiye bazirida öyi, yéza-bazarda yatiqi bolush asasi jehettin ishqa ashqanliqi" tekitlen'gen. Xewerde bayan qilinishiche, yerlik da'iriler teklip qilin'ghan oqutquchilarni aqsuda tutup qélish üchün ularning olturaq öy we teminatini körünerlik yuqiri kötürgen. Lékin közetküchilerning tekitlishiche, xitay da'irilirining Uyghur éligha ichkiri ölkilerdin zor kölemlik oqutquchi teklip qilishi uning 2017-yildin bashlap téximu keskinleshken "Medeniyet qirghinchiliqi" ning bir parchisi iken.

Xitay hökümiti 2017-yili bashlan'ghan chong tutqunda Uyghur tili derslikini birdek bikar qilip, mektep, idare-jem'iyet, ammiwi sorunlarda Uyghur tilida sözleshni chekligen. Uyghurlarning nurghun edebiyat, tarix oqutquchilirini lagérlargha qamap, ata-anisiz qalghan yüz minglighan Uyghur perzentlirini "Yataqliq mektep" namidiki yétimxanilirigha yötkigen. Kishilik hoquq teshkilatliri xitayning bu herikitini "Irqiy qirghinchiliqqa yatidu" dep eyibligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet