Hikvision Mehsulatlirining Uyghurlarni tonuwélish iqtidari yéngi ghulghula qozghidi

Muxbirimiz eziz
2019.11.12

Ötken mezgillerdin buyan Uyghur diyaridiki siyasiy basturush we lagérlargha qamash herikitide biwasite yardemchilik rolini oynighan yuqiri téxnikiliq közitish kaméraliri izchil xelq'araning tenqid obyékti bolup kelgen idi. Bu jehette xitay hökümitini téxnikiliq yardem bilen eng zor derijide temin etken xitay shirketlerning biri Hikvision (xeykang) kaméra shirkiti idi.

IPVM Torida 11-noyabir küni élan qilin'ghan bu heqtiki xewerde körsitilishiche, yéqinda Hikvision kaméra shirkiti bir yürüsh yéngidin layihilen'gen közitish kaméralirini bazargha salghan. Bu kaméraning mehsulat chüshendürüshige éniq qilip “Nishan we obyéktning jinsiy ayrimisi, irqiy ayrimisi (Uyghurmu yaki xitaymu) hemde tére ayrimisini körsitip béreleydu. Toghriliq derijisi 90 pirsenttin yuqiri” dep yézilghan. Halbuki IPVM tori bu mesile heqqide Hikvision kaméra shirkiti bilen alaqileshkendin kéyin shirket derhal mehsulat chüshendürüshidiki yuqiriqi qurlarni öchürüwetken.

Washin'gton shehiridiki Uyghur kishilik hoquq qurulushi teshkilatining tashqi ishlar diréktori layi'a gréw xanim bu heqte söz qilip: “Uyghurlar zor derijide basturuluwatqan hazirqidek peytte mushundaq bir téxnikining bazargha sélinishi yéngi bir qabahetning yétip kéliwatqanliqidin bésharet béridu” dégen.

Amérika hökümitidiki palata ezaliridin marko rubiyo qatarliqlar izchil bu shirketning siyasiy jehettiki basturushqa yantayaq bolushini tenqidlep kelgen bolup, bu shirketning ismi yéqinda tramp hökümiti élan qilghan qara tizimlikke kirgüzülgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.