Мичел бачелет уйғурлар һәққидики доклатни тездин елан қилишқа чақирилған
Бирләшкән дөләтләр тәшкилати (б д т) кишилик һоқуқ алий кеңиши уйғур дияридики сиясий вәзийәт һәққидә мәхсус доклат тәйярлап чиққан болуп, һазирғичә техи елан қилинмиған иди.
-
Мухбиримиз әзиз
2022-01-18 -
-
-
Бирләшкән дөләтләр тәшкилати (б д т) кишилик һоқуқ алий кеңиши уйғур дияридики сиясий вәзийәт һәққидә мәхсус доклат тәйярлап чиққан болуп, һазирғичә техи елан қилинмиған иди. 18-январ күни америка дөләт мәҗлиси қармиқидики хитай ишлири иҗраийә комитетиниң рәислиридин кеңәш палата әзаси җеф меркелий вә авам палата әзаси җеймис мәкговерн б д т кишилик һоқуқ алий кеңишиниң рәиси мичел бачелетқа очуқ мәктуп йоллап, бу доклатни бейҗиң қишлиқ олимпик мусабиқиси башлиништин илгири елан қилишни тәләп қилған.
Мәктупта улар мичел бачелеттин б д т мунбиридә буниңдин бирәр йилчә илгири көрүлгән “хитайни қоллаш” шамилини әслитип өтүш арқилиқ шу вақиттила 50 нәччә мутәхәсссиниң уйғур дияридики зулум вә бастуруш әндишилирини ипадә қилғанлиқини, уларниң шу вақиттила “б д т кишилик һоқуқ кеңиши бу мәсилидә хитай һөкүмитиниң қилмишлирини көзитип туруши лазим” дегәнликини алаһидә тәкитлигән. Мәктупта ениқ қилип: “биз кишилик һоқуқ алий кеңишиниң шунчә көп мутәхәссисләр оттуриға қойған шунчә көп тәвсийәләрни қобул қилмиғанлиқидин бәкму үмидсизләндуқ. Силәрниң бу һәқтики доклатни бейҗиң қишлиқ олимпик мусабиқиси башлиништин илгири елан қилишиңлар, дуня җамаитиниң у җайда немиләрниң болуватқанлиқини ениқрақ билиши үчүн бәкму муһим” дейилгән.
Мәлум болушичә, кишилик һоқуқ алий кеңишиниң бу доклати 2021-йили сентәбирдә қолдин чиққан болсиму, намәлум сәвәбләр түпәйлидин һазирғичә елан қилинмиған икән.