ئۆزبېكىستاننىڭ يېڭى نۆۋەتلىك پرېزىدېنت نامزاتلىرى بېكىتىلگەن

مۇخبىرىمىز قۇتلان
2016-10-29
Share


ئىسلام كەرىموفنىڭ ئۆلۈمىدىن كېيىن، ئۆزبېكىستاننىڭ يېڭى نۆۋەتلىك پرېزىدېنتلىقىنى زادى كىمنىڭ ئۆتكۈزىۋالىدىغانلىقى كۆزەتكۈچىلەرنىڭ دىققەت نۇقتىسىدا تۇرۇپ كەلگەن ئىدى. چۈنكى يېڭى نۆۋەتلىك ئۆزبەك پرېزىدېنتىنىڭ ھەقىقىي ۋە دېموكراتىك سايلام ئارقىلىق ھوقۇق تاپشۇرىۋېلىشى ئىسلام كەرىموف دەۋرىدە ئوتتۇرا ئاسىيادىكى ئەڭ مۇستەبىت دۆلەتكە ئايلانغان ئۆزبېكىستاننىڭ دېموكراتىيەلىشىش يولىغا مېڭىشىنىڭ بىشارىتى بولۇپ قالاتتى.

ئۆزبېكىستان دۆلەت تاراتقۇلىرىنىڭ خەۋىرىگە قارىغاندا، 28 - ئۆكتەبىر كۈنى ئۆزبېكىستان مەركىزى سايلام كومىتېتى يىغىن ئېچىپ، 12 - ئاينىڭ 4 - كۈنى ئۆتكۈزىلىدىغان ئۆزبېكىستاننىڭ يېڭى نۆۋەتلىك پرېزىدېنت سايلىمىغا قاتنىشىش سالاھىيىتىگە ئىگە نامزاتلارنى تاللاپ چىققان.

ئىگىلىنىشىچە، ئۆزبېكىستان مەركىزى سايلام كومىتېتى ئۆزبېكىستاندىكى تۆت پارتىيەدىن جەمئىي تۆت نەپەر پرېزىدېنت نامزاتىنى تاللاپ چىققان بولۇپ، ئۇلار «مىللىي تەرەققىيات دېموكراتىك پارتىيەسى» دىن سەرۋەر سەيدۇللايېف، «تەدبىركارلار ۋە ئاقىللار ھەركىتى ئەركىن دېموكراتىك پارتىيەسى» دىن شەۋكەت مىرزايېف، «خەلق دېموكراتىك پارتىيەسى» دىن ھاتەمجان ئابدۇراھمانوف ۋە «ئادالەت سوتسىيال دېموكراتىك پارتىيەسى» دىن نەرىمان مەجىتوف قاتارلىقلار ئىكەن.

پرېزىدېنت نامزاتلىقىغا كۆرسىتىلگەن بۇ 4 نەپەر نامزات بۈگۈن، يەنى 29 - ئۆكتەبىردىن باشلاپ ئۆزبېكىستاندىكى ھەرقايسى مەتبۇئات ۋە ئاخباراتلاردا ھەمدە ئاممىۋىي تاراتقۇلاردا سايلام تەشۋىقاتلىرىنى رەسمىي باشلايدىكەن. ئۆزبېكىستان مەركىزى سايلام كومىتېتىنىڭ 4 - دېكابىردا ئۆتكۈزىلىدىغان پرېزىدېنت سايلىمىغا ياۋرۇپا خەۋپسىزلىك ۋە ھەمكارلىق تەشكىلاتىنى نازارەتچىلىككە تەكلىپ قىلغانلىقى مەلۇم.

كۆزەتكۈچىلەر، ئۆزبېكىستان سايلام كومىتېتىنىڭ بۇ قېتىملىق پرېزىدېنت سايلىمىنى دېموكراتىك ئۇسۇلدا ئۆتكۈزۈشكە كۆرۈنۈش ھازىرلاۋاتقانلىقىنى، ئەمەلىيەتتە 4 - دېكابىردىكى پرېزىدېنت سايلىمىنىڭ نەتىجىسى پۈتۈنلەي دېگۈدەك ھازىر ۋاقىتلىق ھوقۇق يۈرگۈزىۋاتقان باش مىنىستېر شەۋكەت مىرزايېفنىڭ ئىرادىسى بويىچە بولۇۋاتقانلىقىنى ئىلگىرى سۈرمەكتە.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت