Özbékistan bash ministirining qeshqerni ziyaret qilishi diqqet qozghighan

Washin'gtondin muxbirimiz jewlan teyyarlidi
2024.03.05

Özbékistan bash ministiri abdulla aripow bashchiliqidiki özbékistan wekiller ömiki bu yil 29-féwral künidin 1-mart künigiche qeshqerde ikki künlük ziyarette bolghan. Uningdin bashqa, u yene xitay hökümitining orunlashturushi boyiche, qirghizistan ministirlar kabéntining re'isi aqilbék japparowmu qatnashqan “Üch terep söhbiti” ge qatnashqan. Ottura asiyadiki bu jumhuriyetler xitayning Uyghurlarni basturushigha süküt qilish, hetta b d t da uning qilmishini qollash bilen eyiblinip kelgenidi.

3-Mart küni, en'gliye “Tunji pochta” gézitining bu heqte bergen xewiride körsitilishiche, abdulla aripowning qeshqerni ziyaret qilishining diqqet qozghaydighan bir teripi, qeshqer Uyghur xelqining medeniyet böshüki bolup, 19-esirning 60-yillirida özbékistandin qéchip kelgen yaqupbeg qeshqerde musteqil xanliq qurup 10 yil sorighan.  Bügünki weziyettin éytqanda, abdulla aripowning bu ziyariti özbékistan hökümitining xitay bilen tüzüshken “Yéngi dewrdiki toluq istratégiyelik hemkarliq munasiwiti” ni emelge ashurushning qedem basquchliridin biri iken؛ chünki bu yil 1-ayning 24-küni özbékistan pirézidénti shewket mirzayéf bilen xitay kompartiyesi bash sékrétari shi jinping 52 milyard dollarliq soda we meblegh sélish kélishimi imzalighan.

Xewerde éytilishiche, ötken 30 yilda özbékistan Uyghurlar mesilisige köngül bölüp baqmighan bolup, belki xitay bilen bolghan iqtisadiy munasiwetliride Uyghurlarni qurban qilip kelgen. Bu qétim özbékistan bash ministirining qeshqerni ziyaret qilishi xitayning Uyghur rayonidiki qebih basturushlirini yolluq, qanunluq körsitish rolini oynaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.