Wiyétnam ayroportlirining kompyutér sistémisi intérnét hujumigha uchridi

Wiyétnamning qatnash ministirliki intérnét hujumigha xitay tor buzarliri mes'ul ikenlikni bildürgen.

“Washin'gton waqit géziti” ning xewirige qarighanda, hujum xujimin shehiridiki noybay we tasonhat ayroportlirida birdek körülgen.

BBC Ning xewer qilishiche, bu qétimqi hujumda yene wiyétnam hawa yollirining tor bétimu qisqa muddet tesirge uchrighan.

Melum bolushiche, intérnét hujumi yüz bergen ayroportning biri yeni tasonhat peyshenbe küni bir xitay yoluchi haqaretligen ayrodrom iken.

Xewerge qarighanda, 28 - iyul gu'angdungluq bir xitay yoluchi wiyétnamgha kireshide wiyétnam tamozhna xadimliri uning pasportigha set geptin birini yézip qayturup bergen.

Xitay hökümiti 2012 - yili tarqatqan yéngi pasportlirining bétige jenubiy déngiznimu öz ichige alidighan bir xeritini sus shekilde bésip kirgüzgen idi.

Bu set gep del pasportning shu xitay xeritisi bésilghan bétige yézilghan iken.

Xitay hökümiti wiyétnamdin mezkur weqe üstide tekshürüsh élip bérishni telep qilghan. Wiyétnam buni tekshürüshidighanliqini bildürgen.

Xitay jenubiy déngizning mutleq köp qismini özining, dep élan qilip déngizning parasél we spratél aralliri teweside bir qisim sün'iy arallirini yasighan we herbiy qorallirini orunlashturghan idi.

Emma xitayning bu herikiti wiyétnam, malaysiya, birunéy we filippin qatarliq döletlerning qarshiliqigha uchrighan.

12 - Iyul xelq'ara sot filippin xitay üstidin sun'ghan déngiz teweliki dewasigha qarap chiqip, xitayning mezkur déngizidiki igilik hoquq telipining tarixiy asasiy yoqluqini jakarlighan. Bu xitayning naraziliqini qozghighan idi.