Хитай һөкүмити дуняниң вирус һәққидики ғәзипидин пайпетәк болмақта

Мухбиримиз әзиз
2020-05-05
Share

Йеқинда хитай һөкүмити өзигә сунулған бир парчә ички доклаттин пүтүн дунядики хитайға қарши кәйпият һәмдә буниңға мунасивәтлик инкаслар һәққидә мәлуматлиқ болған. Шуниңдәк буниңдин бәкла әндишигә чүшкән.

Ройтерс агентлиқиниң 4-майдики хәвиридә ейтилишичә, таҗсиман вируси мәсилисидә дунядики һәрқайси дөләтләрниң хитайни әйибләш долқуни юқири пәллигә чиқиватқан бир пәйттә хитай җамаәт хәвпсизлики министирлиқи қармиқидики хәлқара мунасивәт институти өткән айда хитай рәһбәрлик қатлими, җүмлидин ши җинпиң вә башқа дөләт рәһбәрлиригә мәхсус бир парчә доклатни сунған. Хитайдики әң чоң ақиллар мәркизиниң бири тәйярлиған бу доклатта 1989-йилидики «тйәнәнмен қирғинчилиқи» дин буян дуня миқясидики хитайға қарши кәйпиятниң әң юқири пәллигә чиққанлиқи алаһидә әскәртилгән. Болупму бу қетимлиқ таҗсиман вируси мәсилисидә америка башламчилиқидики хитайға қарши долқунниң нөвәттә хитай һөкүмитини интайин начар хәлқара вәзийәткә муптила қилғанлиқи, бу сәвәбтин икки тәрәп оттурисида көрүлүш еһтималлиқи болған қораллиқ тоқунушқа тәйярлиқ қилип қоюшниң зөрүрлүки тәкитләнгән.

Ройтерс агентлиқи мәзкур доклатни көрүшкә мувәппәқ болалмиған. Әмма бу доклатни көргән, исмини ашкарилашни халимиған бир хитай әмәлдар америка-хитай мунасивитиниң өткән мәзгилләрдики әң начар вәзийәткә чүшүп қалғанлиқидәк бу реаллиқниң бейҗиңдики алий рәһбәрликни хели обданла пайпетәк қилғанлиқини сөзләп бәргән.

Хәвәрдә ейтилишичә, бу қетимқи вирус вабасидин кейин америка президенти доналд трамп көп қетим хитайниң бу қетимқи вирусниң зиян-зәхмәтлиригә җавабкар болушини тәкитлигән. Буниңға улишип оттуриға чиққан хитайға қарши пикир еқимида хитайниң нөвәттә ғәрб демократийәсигә хирис вә бихәтәрлик тәһдити пәйда қиливатқанлиқи алаһидә орун егиливатқан болуп, хитай һөкүмитиниңму ши җинпиң дәвридә өзлириниң һәрбий қуввитини ашурушқа көп тәрәплимә тиришчанлиқ көрситиватқанлиқи әскәртилгән. Бәзиләр бу һалға қарап «соғуқ мунасивәтләр уруши» мәзгилидики хәлқара вәзийәтниң аламәтлири көрүлүшкә башлиди, дейишмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.