Wolkéswagén ürümchidiki tijaritini dawamlashturidighanliqini bildürgen

Gérmaniye aptomobil shérkiti-wolkéswagén kishilik hoquq teshkilatlirining tenqidige qarimay ozining ürümchidiki zawutining ishlepchiqirishini dawamlashturidighanliqini bildürgen. Mezkur shirketning éytishiche, uning ürümchidiki zawutida “Mejburi emgekning mewjut bolushi mumkin emes” iken. Wolkéswagénning bayanati amérika, kanada, gérmaniye qatarliq döletlerde wolkéswagén'gha qarshi naraziliq heriketler partlap, uning ürümchidiki zawutini taqishi telep qiliniwatqan mezgilde élan qilindi.

Wolkéswagénning ürümchidiki zawuti 2013-yili qurulghan bolup, uning Uyghur mejburi emgikidin paydigha érishish mumkinchiliki endishe qozghap kelgen. Gérmaniye axbarat agéntliqining xewer qilishiche, wolkéswagénning xitay bazirigha mes'ul emeldari stéfan woléyshtéyn 19-april shangxeyde muxbirlargha bu shirketning ürümchidiki zawutining herkitini aqlap, shirketning mizanigha emel qiliwatqanliqini bildürgen.

U mundaq dégen: “Mejburiy emgektek kishilerning tenqidige uchraydighan bundaq mesilining bizning zawutimizda mewjut bolushi mumkin emes. Chünki biz ishchi-xizmetchilerni biwaste qobul qilimiz,” dégen. Uning éytishiche, “Köp xillashturushning yolgha qoyulushi az sanliq milletlerning ishqa orunlishish mesilisinimu hel qilghan bolup, bu xil usulning héchqandaq kemsitish shekli yoq” iken.

U yene “Shinjanggha meblegh sélish iqtisadiy nuqtidin mumkinla bolsa uni dawamlashturidighanliqi” ni bildürgen. Lékin közetküchilerning éytishiche, wolkéswagén “Ishchi-xizmetchilerni biwaste qobul qilimiz” disimu, biraq rayonda hökümet kontrol qilmighan Uyghur emgek küchi yoq iken.