“Wolkiswagén” shirkitige Uyghurlar heqqide ochuq mektup yollandi

Uyghur diyardiki siyasiy basturush xelq'araning küchlük tenqidige uchrawatqanda en'gliyediki bir türküm pa'aliyetchiler “Wolkiswagin” shirkitining xitaydiki bash ijra'iye re'‍isi stéfan wollénstéyn'gha ochuq mektup yollidi. 27-Dékabir küni “Xarét” torida élan qilin'ghan ochuq mektupqa Uyghur pa'aliyetchi rehime mehmut, “Uyghur qirghinchiliqini toxtitish herkiti” ning diréktori blayir mekdogal, “Kishilik heqlerde yehudiylar sadasi” teshkilatining re'isi mya gros qatarliq alte kishi imza qoydi.

Mektupta re'is stéfan ötken hepte BBC agéntliqining ziyaritini qobul qilghanda “Biz shinjangdiki zawutlirimimizning pa'aliyetlirini dawamlashturimiz” dégenliki alahide eskertilgen halda ularning qirghinchiliq dawam qiliwatqan bir rayondiki sana'et ishlepchiqirishini dawam qilmaqchi bolghanliqi tenqidlendi. Shuning bilen birge “Wolkiswagin” shirkitining bu herkiti emeliyette qirghinchiliqqa shérik bolush ikenliki tekitlendi.

Melum bolushiche, re'is stéfan ziyaret jeryanida özlirining ürümchidiki zawut emgikige mejburiy emgek amilining ariliship qélishidin eng zor derijide saqlinidighanliqini bildürgen bolsimu, mektupta héchqandaq ishning 100 pirsent mukemmel bolmaydighanliqi, del mushu xil “Shübhilik” bolghan mejburiy emgekke chétilip qélish éhtimalidin saqlinish üchün Adidas, H&M qatarliq shirketlerning Uyghur diyaridin chékinip chiqqanliqi tilgha élindi. Shundaqla “Wolkiswagin” shirkitining 1940-yillarda yehudiylar zor qirghinchiliqigha bir qétim ‍iqtisadiy jehettin hemdemde bolghanliqi, emdi oxshash xataliqni yene bir qétim tekrarlap Uyghurlarning qirghin qilinishigha yardemde bolmasliqi telep qilindi.

Melum bolushiche, “Wolkiswagin” shirkitining xitay hökümiti bilen imzalighan xizmet kélishimide 2017-yili élan qilin'ghan “Xitay dölet istixbarat qanuni” gha boysunidighanliqi orun alghan. Bu madda boyiche “Wolkiswagin” shirkiti jezmen xitayning bu jehettiki munasiwetlik xizmetlirini qollishi hemde uninggha hemdem bolushi lazim iken. Xitay istixbarat organliri bolsa del Uyghur diyaridiki milyonlighan Uyghurni tutqun qilish, soraq qilish hemde “Terbiyelesh merkizi” namidiki lagérlargha qamashqa mes'ul iken. Ochuq mektupta mushu ehwal alahide tekitlinish bilen birge ularni Uyghur diyaridiki zawutlarni xitay sirtigha köchürüp kétish, shu arqiliq “Wolkiswagin” shirkitining izzitini hemde xelq'aradiki hörmitini saqlash telep qilindi.