Волкисвагенниң уйғур елидин чекиниши 2024-йилдики 10 чоң “кишилик һоқуқ хәвири” ниң бири болған

Кишилик һоқуқни көзитиш тәшкилати һәр йили дегүдәк дуняниң һәр қайси җайлиридики кишилик һоқуқ мәсилилиригә аит чоң хәвәрләрни таллап, кишиләрниң диққитигә сунуп кәлгән болуп, бу хәвәрләр ирқий қирғинчилиқ, мәҗбурий әмгәк, сиясий мәһбусларниң җазалинишидин тартип мейиплар вә көчмәнләр һоқуқиниң дәпсәндә қилиниши, һөкүмәт, җәмийәт вә аммиви тәшкилатларниң бу һәқтә немә ишларни қилғанлиқи, кишилик һоқуқни қоғдаш җәһәттә дуняда қандақ илгириләшләрниң қолға кәлтүрүлгәнлики дегәндәк нуқтиларға четилидикән.

Кишилик һоқуқни көзитиш тәшкилатиниң тор бетидә елан қилинған, 2024-йиллиқ 10 чоң “кишилик һоқуқ хәвири” ичидә биринчиси, германийә волкисваген ширкитиниң уйғур елидин чекиниши һәққидики хәвәр болған. Волкисваген ширкити бу йил үрүмчидики завутини тақап, уйғур елидин пүтүнләй чекинидиғанлиқини қарар қилған. 2012-Йил қурулған бу завут уйғур мәҗбурий әмгикигә четишлиқи билән изчил әйиблинип кәлгән болуп, хитайға қоюлған мәҗбурий әмгәк җазаси вә хәлқара әйибләшләрниң бу ширкәтниң касатлишиши вә хәлқара базарда игилигән нисбитиниң төвәнлишигә хели күчлүк сәвәб болғанлиқи мәлум. Мана булар кишилик һоқуқни қоғдаш күришиниң йәнә бир чоң нәтиҗиси дәп қаралған. Кишилик һоқуқни көзитиш тәшкилати бу һәқтә бәргән баһасида: “волкисваген ширкити бурунла шундақ қилиши керәк иди. Бу ширкәтниң чекиниши хитай һөкүмити инсанийәткә қарши җинайәт өткүзүватқан, уйғур вә башқа түркий милләтләрни мәҗбурий әмгәккә селиватқан бу районда әхлақий мәсулийәт билән ширкәт маңдурушниң мумкин болмайдиғанлиқини көрситип бериду” дегән.