“Xitay ishliri boyiche xelq'ara parlaméntlar birleshmisi” wolkiswagénni Uyghur élidin chiqip kétishke chaqirdi

“Xitay ishliri boyiche xelq'ara parlaméntlar birleshmisi” gérmaniyening dangliq aptomobil shirkiti wolkiswagénni Uyghur élidin chiqip kétishke chaqirghan.

Mezkur birlik 19 neper parlamént ezasining imzasi bilen wolkiswagén bashqurush hey'itining re'isi oliwér bilumgha mektup ewetip, wolkiswagénning xitay hökümitining Uyghurlargha qaritiwatqan siyasetlirige aktip maslashqanliqini tenqid qilghan.

“Xitay ishliri boyiche xelq'ara parlaméntlar birleshmisi” mektupida wolkiswagén shirkitining xitay bilen hemkarliship qurghan ürümchidiki zawutining iqtisadiy teptish ehwali heqqide qolgha chüshken höjjetni tilgha élip turup, ularning rayonda yolgha qoyuluwatqan “Milletler ittipaqliqi” ni ilgiri sürüsh namida Uyghurlar we bashqa az sanliq milletlerge yürgüzülgen assimilyatsiye siyasetlirini qollighanliqini, teminlesh zenjiridiki pakiz qilip körsitish arqiliq ammini qaymuqturup mejburiy emgek amilini yoshurushqa urun'ghanliqini eyibligen.

21-Öktebir küni yézilghan mektupta mundaq déyilgen:  “Wolkiswagén'gha oxshash yawropadiki bir chong shirketning assimilyatsiye siyasitini teshebbus qilghan bir zawutni dawamliq échishini, teminlesh zenjirining pakizliqi toghrisidiki mes'uliyitide yalghanchiliq qilishini qobul qilghili bolmaydu. Biz wolkiswagénning rayonda heqiqiy kishilik hoquqni kapaletke ige qilish mes'uliyitini ada qilghili bolmaydighanliqini étirap qilip, shinjangdin chékinishke chaqirimiz”.

“Xitay ishliri boyiche xelq'ara parlaméntlar birleshmisi” mektupida, xitay hökümiti insaniyetke qarshi jinayet yürgüzüwatqan bu rayonda shirketlerning insaniy we exlaqiy mes'uliyet tuyghusi bilen tijaret qilishining mumkin emesliki, eksiche bu shirketlerning rayondiki mewjutluqining xitayning bu xelqlerge yürgüzüwatqan zulumlirigha shérik bolushtek aqiwetni peyda qilidighanliqini agahlandurghan.

Ular axirida yene, wolkiswagén shirkitini yawropaning alaqidar qanun-belgilimilirige ri'aye qilish, xelq ammisi we hessidarlirini yalghan teptish doklati arqiliq aldighanliqidin kechürüm sorashqa dewet qilghan.