«Вал-стрит журнили» да уйғур аптоном райони секретари чен чүәнго һәққидә мақалә елан қилинди

Мухбиримиз ирадә
2019-04-08
Елхәт
Пикир
Share
Принт

Америкадики нопузлуқ ахбарат органлиридин «вал-стрит журнили» да уйғур аптоном райони парткоми секретари чен чүәнго һәққидә бир парчә мақалә елан қилинди.

Мақалидә, уйғур аптоном райониға 2016-йили йөткәп келингәндин бери қаттиқ қоллуқ башқуруш сияситиниң башламчиси сүпитидә тонулуватқан чен чүәнгониң уйғур елигә йөткәп келинишидики сәвәбләр тәпсилий чүшәндүрүлгән.

Мақалә апториниң баян қилишичә, 1955-йили хенән өлкисидә туғулған чен чүәнго 1980-йили хенәндики мәлум бир наһийәниң башлиқи болған. У дәсләптә 1999-йилида фалунгоң муритлириға зәрбә бериш һәрикитидә актип хизмәт көрситип көзгә көрүнгән. Андин у 2009-йили хебей өлкисигә муавин өлкә башлиқи қилип йөткәп апирилған вә бу җайда йеңичә башқуруш усулини йолға қоюп, уни өлкиниң мәркизи шиҗаҗуаңда синақ қилған. У бу җәрянда наһайити мукәммәл системилашқан сақчиханиларни омумлаштуруп, назарәт вә бихәтәрлик тәдбирлирини күчәйткән.

Чен чүәнго, 2011-йили тибәткә йөткәп апирилғандин кейин, тибәттә 700 сақчи понкити қурған. Тибәтләрниң миллий кимлик идийәсини суслаштуруш, уларниң хитайлар билән тойлишишини илгири сүрүш, кадирларни тибәт аһалилириниң өйлиригә йәрләштүрүш, далай-ламаға чоқунидиған тибәтләрни қайта тәрбийә синиплириға әвәтиш қатарлиқ сиясәтләрни башлиған.

Апторниң әскәртишичә, ахири 2016-йили уйғур елигә йөткәп келингән чен чүәнго юқиридики бу пүтүн тәҗрибә вә сиясәтлирини юғуруп, уни уйғур елидә нәччә һәссә күчәйтип иҗра қилған. Техиму муһими, у бундақ залимларчә сиясәтлирини юқири дәриҗилик пән-техника билән бирләштүргән. У, уйғур диярини башқурған қисқиғина икки йерим йил ичидә уйғур елидә 7700 қулайлиқ сақчи понкити қурулған, бир милйондин ошуқ киши лагерлириға қамалған, юқири техникалиқ назарәт вә тәқибләш ишқа ашурулған, 100 миң нәпәр сақчи вә бихәтәрлик хадими қобул қилиш елани берилгән. Уйғур елиниң бихәтәрлик хираҗити икки қатлинип, 8 йерим милярд доллардин ешип кәткән.

Мақалидә баян қилинишичә, қисқиси, униң бу нәтиҗилири хитай компартийәси мәркизи комитетиниң алқишиға еришкән вә у 2017-йили 25 әзадин тәркиб тапқан сиясий бюроға киргән, униң әмдики нишани болса 7 кишилик сиясий бюро даимий һәйитигә кириш икән.

Көзәткүчиләрниң қаришичә, юқиридики бу мақалә уйғур елидә йолға қоюлуватқан сиясәтләрниң баш-ахирини чүшиништә интайин муһим арқа көрүнүш билән тәминләйдикән.

Пикирләр (0)
Share
Толуқ бәт