"Wal-strit zhurnili" da Uyghur aptonom rayoni sékrétari chén chüen'go heqqide maqale élan qilindi

Muxbirimiz irade
2019-04-08
Élxet
Pikir
Share
Print

Amérikadiki nopuzluq axbarat organliridin "Wal-strit zhurnili" da Uyghur aptonom rayoni partkomi sékrétari chén chüen'go heqqide bir parche maqale élan qilindi.

Maqalide, Uyghur aptonom rayonigha 2016-yili yötkep kélin'gendin béri qattiq qolluq bashqurush siyasitining bashlamchisi süpitide tonuluwatqan chén chüen'goning Uyghur élige yötkep kélinishidiki sewebler tepsiliy chüshendürülgen.

Maqale aptorining bayan qilishiche, 1955-yili xénen ölkiside tughulghan chén chüen'go 1980-yili xénendiki melum bir nahiyening bashliqi bolghan. U deslepte 1999-yilida falun'gong muritlirigha zerbe bérish herikitide aktip xizmet körsitip közge körün'gen. Andin u 2009-yili xébéy ölkisige mu'awin ölke bashliqi qilip yötkep apirilghan we bu jayda yéngiche bashqurush usulini yolgha qoyup, uni ölkining merkizi shijaju'angda sinaq qilghan. U bu jeryanda nahayiti mukemmel sistémilashqan saqchixanilarni omumlashturup, nazaret we bixeterlik tedbirlirini kücheytken.

Chén chüen'go, 2011-yili tibetke yötkep apirilghandin kéyin, tibette 700 saqchi ponkiti qurghan. Tibetlerning milliy kimlik idiyesini suslashturush, ularning xitaylar bilen toylishishini ilgiri sürüsh, kadirlarni tibet ahalilirining öylirige yerleshtürüsh, dalay-lamagha choqunidighan tibetlerni qayta terbiye siniplirigha ewetish qatarliq siyasetlerni bashlighan.

Aptorning eskertishiche, axiri 2016-yili Uyghur élige yötkep kélin'gen chén chüen'go yuqiridiki bu pütün tejribe we siyasetlirini yughurup, uni Uyghur élide nechche hesse kücheytip ijra qilghan. Téximu muhimi, u bundaq zalimlarche siyasetlirini yuqiri derijilik pen-téxnika bilen birleshtürgen. U, Uyghur diyarini bashqurghan qisqighina ikki yérim yil ichide Uyghur élide 7700 qulayliq saqchi ponkiti qurulghan, bir milyondin oshuq kishi lagérlirigha qamalghan, yuqiri téxnikaliq nazaret we teqiblesh ishqa ashurulghan, 100 ming neper saqchi we bixeterlik xadimi qobul qilish élani bérilgen. Uyghur élining bixeterlik xirajiti ikki qatlinip, 8 yérim milyard dollardin éship ketken.

Maqalide bayan qilinishiche, qisqisi, uning bu netijiliri xitay kompartiyesi merkizi komitétining alqishigha érishken we u 2017-yili 25 ezadin terkib tapqan siyasiy byurogha kirgen, uning emdiki nishani bolsa 7 kishilik siyasiy byuro da'imiy hey'itige kirish iken.

Közetküchilerning qarishiche, yuqiridiki bu maqale Uyghur élide yolgha qoyuluwatqan siyasetlerning bash-axirini chüshinishte intayin muhim arqa körünüsh bilen teminleydiken.

Toluq bet