«Вал стирет журнили» гезити бир хитай ширкитиниң ақсудики бир лагер йенида зор көләмлик завут қуруп, тутқунларни ишқа салғанлиқини ашкарилиди

Мухбиримиз әркин
2019-05-17
Елхәт
Пикир
Share
Принт

Америкиниң «вал стирет журнили» гезити 16‏-май күни мақалә елан қилип, «хуафу мода ширкити» намлиқ бир хитай пахта тоқумичилиқ гуруһиниң ақсудики бир лагерниң йенида завут қуруп, тутқунларни ишқа селиватқанлиқини ашкарилиди. Мәзкур гезитниң хәвиридә илгири сүрүлүшичә, йәрлик даириләр чоң көләмлик «кәспий тәрбийәләш мәркизи» дәп тонуштурған бу орун 2017‏-йили 12‏-айда қурулған икән. Хәвәрдә, униң дунядики әң чоң арилашма рәңлик пахта тоқумичилиқ фабрикилириниң бири икәнлики билдүрүлгән.

Йеқинда «вал стирет журнили» гезитиниң мухбири ақсуни зиярәт қилип, бу орундики бәзи тәрбийәләнгүчиләр вә йәрлик даириләр билән сөзләшкән. Хәвәрдә баян қилинишичә, йәрлик даириләр уйғурларниң мәҗбурий әмгәккә селиниватқанлиқини рәт қилған болсиму, лекин бу фабрикида ишләйдиған сүбһинур ғоҗам исимлик 20 яшлиқ бир уйғур қизи өзиниң бу орунға «тәрбийәләш мәркизи» дин кәлгәнликини билдүргән. У өзидә бурун радикал идийә барлиқини, лекин һазир униңдин қутулғанлиқини илгири сүргән. Бу «вал стирет журнили» гезитиниң тунҗи қетим хитай тоқумичилиқи карханилириниң лагер йениға завут қуруп, лагердики тутқунларни мәҗбурий ишқа селиватқанлиқини хәвәр қилиши әмәс. У өткән йили хитай «тәйда» тоқумичилиқ һәссидарлиқ ширкитиниң хотәндики бир лагер йенида завут қуруп, тутқунларниң ишқа селиниватқанлиқини ашкарилиған. «Тәйда» ширкитиниң хотәндики завутидин кийим-кечәк импорт қилған америкидики «баҗер тәнтәрбийә кийимлири» ширкити өзиниң уйғур районидин кийим-кечәк импорт қилишни тохтатқанлиқини елан қилған. «Вал стирет журнили» гезитиниң хәвиридә қәйт қилинишичә, хитайниң мусулманларни лагерларға қамап, уларни мәҗбурий әмгәккә селиши адидас, һеннес вә мауритес, крафтиз һейнес, гәп вә кока коладәк район билән сода алақиси бар чоң хәлқара ширкәтләрни осал әһвалға чүшүрүп қоймақтикән.

Пикирләр (0)
Share
Толуқ бәт