"Wal stirét zhurnili" géziti bir xitay shirkitining aqsudiki bir lagér yénida zor kölemlik zawut qurup, tutqunlarni ishqa salghanliqini ashkarilidi

Muxbirimiz erkin
2019-05-17
Élxet
Pikir
Share
Print

Amérikining "Wal stirét zhurnili" géziti 16‏-may küni maqale élan qilip, "Xu'afu moda shirkiti" namliq bir xitay paxta toqumichiliq guruhining aqsudiki bir lagérning yénida zawut qurup, tutqunlarni ishqa séliwatqanliqini ashkarilidi. Mezkur gézitning xewiride ilgiri sürülüshiche, yerlik da'iriler chong kölemlik "Kespiy terbiyelesh merkizi" dep tonushturghan bu orun 2017‏-yili 12‏-ayda qurulghan iken. Xewerde, uning dunyadiki eng chong arilashma renglik paxta toqumichiliq fabrikilirining biri ikenliki bildürülgen.

Yéqinda "Wal stirét zhurnili" gézitining muxbiri aqsuni ziyaret qilip, bu orundiki bezi terbiyelen'güchiler we yerlik da'iriler bilen sözleshken. Xewerde bayan qilinishiche, yerlik da'iriler Uyghurlarning mejburiy emgekke séliniwatqanliqini ret qilghan bolsimu, lékin bu fabrikida ishleydighan sübhinur ghojam isimlik 20 yashliq bir Uyghur qizi özining bu orun'gha "Terbiyelesh merkizi" din kelgenlikini bildürgen. U özide burun radikal idiye barliqini, lékin hazir uningdin qutulghanliqini ilgiri sürgen. Bu "Wal stirét zhurnili" gézitining tunji qétim xitay toqumichiliqi karxanilirining lagér yénigha zawut qurup, lagérdiki tutqunlarni mejburiy ishqa séliwatqanliqini xewer qilishi emes. U ötken yili xitay "Teyda" toqumichiliq hessidarliq shirkitining xotendiki bir lagér yénida zawut qurup, tutqunlarning ishqa séliniwatqanliqini ashkarilighan. "Teyda" shirkitining xotendiki zawutidin kiyim-kéchek import qilghan amérikidiki "Bajér tenterbiye kiyimliri" shirkiti özining Uyghur rayonidin kiyim-kéchek import qilishni toxtatqanliqini élan qilghan. "Wal stirét zhurnili" gézitining xewiride qeyt qilinishiche, xitayning musulmanlarni lagérlargha qamap, ularni mejburiy emgekke sélishi adidas, hénnés we ma'urités, kraftiz héynés, gep we koka koladek rayon bilen soda alaqisi bar chong xelq'ara shirketlerni osal ehwalgha chüshürüp qoymaqtiken.

Toluq bet