Хотән валийси уйғур кадирларни "иккийүзлимичиләр" ни паш қилишқа чақирған

Мухбиримиз җүмә
2017-05-06
Share


Хитай даирилири уйғур районида аталмиш "иккийүзлимичи" кадирларни паш қилиш мукапати тәсис қилип узун өтмәй, хотән валийси "хотәндики муқимлиқ вәзийитиниң түптин өзгәрмәслики" дики сәвәбни уйғур кадирлар арисидики аталмиш "иккийүзлимичиләр" гә дөңгигән вә уйғур кадирларни буларни паш қилишқа чақирған.

Хотән валийси әзиз муса шинҗаң гезитидә 5-май елан қилған мақалисидә аталмиш "иккийүзлимичи" уйғур партийә әзалирини "кадирлар қошуниниң номуси, ‹3 хил күч' ләрниң қолчомиқи, милләтниң хаини" дәп һақарәтлигән.

Униң қаришичә, "иккийүзлимичи" кадирлар "алий маарип тәрбийәси алған, һәтта партийә мәктәпләрдә оқуған болсиму, каллисида бөлгүчилик, өчмәнлик толуп ташқан, партийә вә дөләткә өчмәнлик қилидиған, хитай кадирларни өч көридиған, җуңхуа хәлқ җумһурийити, җуңхуа миллити вә җуңхуа мәдәнийитини чәткә қақидиған кишиләр" икән.

У йәнә, аталмиш икки йүзлимичи уйғур кадирлар һәққидики тәриплирини давам қилип ундақ дегән: "улар партийәгә киргәндә қәсәм берип партийә билән маңимиз, дәйду-ю, һалқилиқ пәйткә кәлгәндә динға ишиниду, ичидә партийәгә қайил болмайду, һимайә қилмайду, партийәниң тақимини йәп, партийәниң анисини тиллайду, партийәниң қазинини чақиду."

Униң ейтишичә йәнә, кадирлар арисида "иккийүзлимичи" ләр чиқип қалса улар "уч хил күч" ләргә чапан йепиш ролини өтәйдикән.

У ахирида башқа уйғур кадирларға хитаб қилип уларни "көзини төт ечишқа, мәйдани мустәһкәм вә байриқи рошән һалда‹ иккийүзлимичиләр' ни паш қилиш" қа дәвәт қилған.

Мәлум болушичә, уйғур аптоном райони өткән айниң бешида ашкарилиған кадирларни паш қилиш һәққидики мукапатлаш түзүмидә, паш қилинған кадирға берилгән җазаниң чоң-кичикликигә қарап, паш қилғучиға 10 миң сомдин 500 миң сомғичә мукапат берилидиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт