Xoten waliysi Uyghur kadirlarni “Ikkiyüzlimichiler” ni pash qilishqa chaqirghan
2017.05.06
Xitay da'iriliri Uyghur rayonida atalmish “Ikkiyüzlimichi” kadirlarni pash qilish mukapati tesis qilip uzun ötmey, xoten waliysi “Xotendiki muqimliq weziyitining tüptin özgermesliki” diki sewebni Uyghur kadirlar arisidiki atalmish “Ikkiyüzlimichiler” ge dönggigen we Uyghur kadirlarni bularni pash qilishqa chaqirghan.
Xoten waliysi eziz musa shinjang gézitide 5-may élan qilghan maqaliside atalmish “Ikkiyüzlimichi” Uyghur partiye ezalirini “Kadirlar qoshunining nomusi, ‛3 xil küch‚ lerning qolchomiqi, milletning xa'ini” dep haqaretligen.
Uning qarishiche, “Ikkiyüzlimichi” kadirlar “Aliy ma'arip terbiyesi alghan, hetta partiye mekteplerde oqughan bolsimu, kallisida bölgüchilik, öchmenlik tolup tashqan, partiye we döletke öchmenlik qilidighan, xitay kadirlarni öch köridighan, jungxu'a xelq jumhuriyiti, jungxu'a milliti we jungxu'a medeniyitini chetke qaqidighan kishiler” iken.
U yene, atalmish ikki yüzlimichi Uyghur kadirlar heqqidiki teriplirini dawam qilip undaq dégen: “Ular partiyege kirgende qesem bérip partiye bilen mangimiz, deydu-yu, halqiliq peytke kelgende din'gha ishinidu, ichide partiyege qayil bolmaydu, himaye qilmaydu, partiyening taqimini yep, partiyening anisini tillaydu, partiyening qazinini chaqidu.”
Uning éytishiche yene, kadirlar arisida “Ikkiyüzlimichi” ler chiqip qalsa ular “Uch xil küch” lerge chapan yépish rolini öteydiken.
U axirida bashqa Uyghur kadirlargha xitab qilip ularni “Közini töt échishqa, meydani mustehkem we bayriqi roshen halda‛ ikkiyüzlimichiler‚ ni pash qilish” qa dewet qilghan.
Melum bolushiche, Uyghur aptonom rayoni ötken ayning béshida ashkarilighan kadirlarni pash qilish heqqidiki mukapatlash tüzümide, pash qilin'ghan kadirgha bérilgen jazaning chong-kichiklikige qarap, pash qilghuchigha 10 ming somdin 500 ming somghiche mukapat bérilidighanliqini bildürgen.